أضف الموضوع
الشاعر الميرزا عادل أشكناني - 06/10/2015م - 1:02 ص | عدد القراء: 5877
راح أعوف البيت...بمصرعي لبيت
نحري قرباني...ربي يا ربي
حسينك آنا و دارت اعله حسين الأيام
اعذرني يا رب ما أحج ابمكه هالعام
ابكربله واجب أحج ابحج الإسلام
و ألبس الثياب الحرب مو ثوب الإحرام
نازع إحرامي...و جايب إخيامي
الكربله قاصد...ربي يا ربي
راح أحول حجي يا ربي برض الطفوف
راح أخلي الكعبة جسمي و عينك اتشوف
ارماح و اخيول و عساكر حولي اتطوف
و الحجر نحري و تقبل نحري السيوف
راسي ميزابي...و زمزم اخضابي
عالرمح ناديت...ربي يا ربي
ابكربله لمن أصير الكعبة آني
يعني أبو فاضل صبح ركني اليماني
هوه شادر و آني و أستاري و كياني
لو وقع يم النهر توقع أركاني
بيتك المعمور...ظهره ظل مكسور
عالنهر ناجاك...ربي يا ربي
حجي يا رب يختلف عن البقية
راح ألبي و راسي فوق السمهرية
و الوقوف ابعرفه بالغاضرية
و المبيت ابمنه تحت الأعوجية
مذبح إسماعيل...بيه تدوس الخيل
و الحطيم ايصيح...ربي يا ربي
و السعي سعي العقيلة من السياط
طلعت امن الخيمه تسعي و القلب شاط
الصفه تل زينبي و المروة فسطاط
بينهم زينب تهرول سبعة أشواط
بالمعارة اتحوم...اشما تطيح اتقوم
اتنادي يا ستار...ربي يا ربي
و عيد الأضحه بيه تعيد آل أميه
حين دخلت زينب الكوفه سبيه
لو ردت تسألني شمقدم ضحيه
ابدال كبش الأعظم امضحي ابرقيه
خل يجي إبراهيم...ايشوف هالتقديم
عالطشت صاحت...ربي يا ربي |
|
