أضف الموضوع
الشاعر سيد سعيد الصافي الرميثي - 17/09/2015م - 4:33 م | عدد القراء: 2347
ضامي اعتنيتك...كوثر لقيتك
حبك سبيل المكرمه... أول صفاتك هاي
فضلك مثل غيث السمه... يالما شُربت الماي
زاير يبن حامي الحمه ...متعتني لك مشاي
أدري الثمن بذل الدمه... شيعي و أظل وفّاي
واجب عليه...مشايه جيتك
من المهد قلت لك نعم... قمت و صحت لبيك
بإسمك قسمت أعظم قسم ...فدوه الترب رجليك
قلبي عله ايميني علم... متعني زاير ليك
آنا أدري كل خطوة جدم... باجر أجرها اعليك
حبك ملكني...ابيوم الهويتك
لجل الشرف يالرخصت... بالحومه سيل ادماك
رمز المجد و العز صرت... ربك كرامه انطاك
للعبره عنوان أصبحت ...لمن يمر ذكراك
طاحت عروش و ما طحت... مثل الجبل شفناك
لمن أطوفك... بيت الله بيتك
نقسم و حق كسر الضلع ننسه العهد هيهات
يترك أثر سيل الدمع من يجري عالوجنات
رغم الظلم رغم المنع رفت إلك رايات
نمشي الضريحك نتجمع تتوحد الغايات
شيعه و هدفنه...ننشر قضيتك
يا محور الحب و الأمل يا كعبة الأحرار
عشاق إلك من الأزل يبن الوصي الكرار
هاي الوفود أروع مثل عن شيمت الزوار
داست عله احدود الوجل رفضت تذل للعار
متعنيه يمك...كلها ابحميتك |
|
