أضف الموضوع
الشاعر زيد السلامي - 02/06/2015م - 7:04 م | عدد القراء: 4971
ترد يمته ترد ...و اتشوفك العين
يمن مهدك يشابه ...قبة حسين
خد الرايه ينباس...بيدك عقب عباس
ترد يمته ترد... و اتشوفك العين
ابميلادك يبو صالح يمهيوب
الفجر وده رساله ابلون الغروب
إلك و امعنونه ابحبر القلوب
ووقعنه الرساله بصبر أيوب
و لأن نعلم تجي البحر المجالس
كتبنه أشواقنه ابلهفة نوارس
كشخنه بصبر عيدك...يبو صالح نريدك
ترد يمته ترد... و اتشوفك العين
لتمر بالحلم يبن الزجيه
لأن صار الحلم جندي أميه
و على كل جفن شايل بندقيه
ميريدك تجي للغاضريه
لتمر بالحلم مرّت الخطار
ملك ردنه الفرح منريده إيجار
ملكنه الفرح كونه ...إلك يحجي بعيونه
ترد يمته ترد... و اتشوفك العين
ابميلادك الحب ضوه وريده
و لا حافر يصل صدر القصيده
الحجه و الما حجه حجيه اشيفيده
الأخرس بعد منصدق نشيده
اشلون انصدق ادموع التماسيح
الأفاعيها صفت حبل المراجيح
التريد اتموت الأطفال ...تضدنه و عدنه آمال
ترد يمته ترد... و اتشوفك العين
نذر لمن تجي و اتشوفك العين
نفرش دربك بتوج السلاطين
نخّضر ثورة من غصن المساكين
و عله نحر الرمل نشهر بساتين
صلح منسوي بين السهم و الجود
ننصب محكمه و القاضي الزنود
يبو صالح عله النار ...الخيم محتاجتك ثار
ترد يمته ترد... و اتشوفك العين |
|
