أضف الموضوع
الشاعر السيد عبدالخالق المحنّه - 07/03/2015م - 4:16 م | عدد القراء: 3960
عله سور النجف ...دِمه نحري هتف
أنا فدوه العلي...هيَّ كلمة شرف
هي من أرض النجف تبدي البدايه
و تنتهي الدنيه و تظل هي النهايه
و الجهل أرض النجف يجهل اهوايه
بيها سيف الله و نفس سيد البرايه
علي سر هل أته ...علي أول فته
عله نهج الولي...هي كلمة شرف
يا سفينة نوح ارسي بالسلامه
موسه إخلع نعلك بوادي الكرامه
هذي أرض الغيره و الحب و الشهامه
بيها حيدر يعني كون الله و نظامه
تره أول رفض...بده من هالأرض
و أنا بيها أعتلي...هي كلمة شرف
إحنه من أول خلقنه رافضيه
إحنه حبينه علي و نرفض أميه
إحنه أولاد الصميده الحيدريه
نجفيه الغيره و الله نجفيه
تره لو ننقتل...فلا نعرف نذل
بقه دمنه ايغلي...هي كلمة شرف
الما رضه يعرف علي يجهل دليله
و الحياة ابلايه حيدر مستحيله
و اليموت و جفت اذنوب جثيله
خل يأمن علي ما ينطي دخيله
أنا دمي جره...عله حب حيدره
إله كل شي إلي...هي كلمة شرف
الما يحن لرض النجف ميت ضميره
هذا مو فاقد بصر فاقد بصيره
مو شريف الما قبل حيدر أميره
الغيره بس عدنه و بعد ما تلقه غيره
علي هوه الضوه...تره شيعي الهوه
إله فدوه هلي...هي كلمة شرف
كل موالي نجفي هذا هدفنه
هي ذره و ضوت الدنيه نجفنه
لو زعلنه يا غشيم ايمس طرفنه
ويه حيدر وقفت الأشتر وقفنه
أنا كلي فده...عله أنف العده
علي حب أولي...هي كلمة شرف
إحنه حبنه الحيدره لا ما تكرر
لوله حيدر ما بقت الله أكبر
ما تنازلنه رغم أنف التجبر
و النواصب تنهزم لو صحنه حيدر
علي أول نبض...علي أول فرض
علي نور العلي...هي كلمة شرف |
|
