أضف الموضوع
الشاعر السيد عبدالخالق المحنّه - 26/12/2014م - 1:48 ص | عدد القراء: 18459
من اليسر زينب إجت... يمك يعباس و بجت
رجعت جميع العايله... نار المصايب ما طفت
عباس يا عباس
عالناقه زينب نادتك عباس اجيت الشوفتك
مشتاقه أشوفك يالقمر و اجروحي كلها اتعنتك
هاي الضيوف ابكربله بيوم أربعينك زارتك
يا خويه مجروح القلب انشر عليه رايتك
أشكي لك أفعال الزمن... شفنه المصايب و المحن
أحجيلك و انت استمع... هاي المصايب ما جرت
عباس يا عباس
استقبل اضيوفك إجو من اليسر ليك اعتنو
ريتك تشوف اللي حصل يا با الفضل من انسبو
بين الحوافر جم طفل مات و عدا اللي ضيعو
يوم الطحت عالمشرعه هجموا علينه و فرهدو
شفت الجرالي و عاتبت...وينك يبو الغيره صحت
يالنايم ابعينك سهم... زينب بلا كافل بقت
عباس يا عباس
امنيتي من هذا العمر يم قبرك أحفر لي قبر
ملهوفه خويه الشوفتك بس شوفتك تطفي الجمر
يا حادي ضعني شأخرك يحدي الشمر ضعن اليسر
يا خويه و الله اتعذبت بعدك و لا ينفع صبر
كلما يضربوني صحت... ها يا قمر هاشم شفت
بت حيدر ابلايه اخو ...وسفه العزيزه اتيسرت
عباس يا عباس
انطيني جف المنقطع خله ينشف لي الدمع
مكسورة الخاطر أنا مهضومه محنية ضلع
إختك و أنا و صوتي انسمع صوت الجرح ما ينسمع
ما أنسه لوعت كربله يوم الإجه اعلينه الفزع
يا خويه عالدنيه العفه ...يوم الخذوني امجتفه
يا الما اجيت ابغربتي... عالناقه زينبكم صفت
عباس يا عباس
صعبه على بت حيدره تمشي يخويه اميسره
كلما يشتموني صحت وينك يسبع القنطره
ماتت رقيه امن الحزن أذكرها و المدمع جره
من شاهدت راس الأبو يا خويه شبقت منحره
تسألني عنك كل وكت... أسكت لجن دمعي يكت
و اتقلي وينه كافلج... منك أبد ما أيست
عباس يا عباس
يا خويه ظهري ينكسر كلما يحاجيني الشمر
صح انسبيت اويه الغرب لكن بقيت أم الخدر
رجعت جميع العايله بس عن رقيه أعتذر
ظلت تون طول الدرب تاليها ماتت تنتظر
شتريد أسولفلك بعد ...أحزاني ما صارت أبد
منهو اليصدق بت علي... عالناقه مسبيه مشت
عباس يا عباس |
|
