أضف الموضوع
الشاعر السيد سعيد الصافي الرميثي - 09/02/2014م - 11:51 م | عدد القراء: 2644
القبرك يا بو الأحرار...يا يوم إنرد إنزوره
طالت أيام الهجره ...و الفاقد يصعب صبره
يالتعلم بينه إشصار...يا يوم إنرد إنزوره
يحسين ثدي إمحبتك غذانه...هذا الشعور اليسري ويه إدمانه
عاشور من نظر إهلال أحزانه ...يسعر لهيب إقلوبنه الولهانه
نذكر ذيج الأيام ...مرت مثل الأحلام
أيام البيها اربينه...ما ظن إتعود إعلينه
لعبت بينه الأقدار...يا يوم انرد إنزوره
هاي المحبه الصادقه نبديها...فطره سليمه و كل دغش ما بيها
تعرف سبب أولها من تاليها...هالخدمه غايتنه و نموت اعليها
لكن حب الأطماع...تغييره إيصير إبساع
و الحب اليصبح ثوره...متأصل من الفطره
و إحنه الشيعه الأنصار...يا يوم إنرد إنزوره
يحسين كثره امن الكتب طالعنه ...و اهوايه ثورات اللي بيها اسمعنه
شفناها يبن الزهره ما تنفعنه ...ثورتك هيه الجسدت واقعنه
ثوره و بيها الآمال...كسبت كل الأجيال
هاي الثوره التجدد...هيه اللازم تتخلد
و تهتف يبن الكرار...يا يوم إنرد إنزوره
يحسين و إلمسنه ابصفاتك قدره...تصميمك إبيوم العلنت الهجره
تعرف مصيره و الظروف الخطره ...دمك تفوق عالسيوف إبنصره
هالقدره و هالإيمان...من إخلاص الوجدان
حته اليرضع قدمته...و دين المعبود إحفظته
كعبه إتظل للثوار...يا يوم إنرد إنزوره
يحسين ذكرك لمن ايسمعونه ...حته الوعي عدوانك إيفقدونه
مصدر أساس التضحيه إيعرفونه...مشعل لهيبك حاولوا يطفونه
هالمشعل شيطفيه...و الدم يتفجر بيه
موجوده إزنود إترفعه ...تفدي الأرواح إموقعه
و إتصيح إنريد الثار...يا يوم إنرد إنزوره
يحسين بيك امن المهد آمنه...عشنه القهر و إصبرنه و إتوطنه
و بخدمتك نرجه نطب للجنه...حاشاك بالمحشر تقصر عنه
ميخيب اليترجاك...تتعذر له حاشاك
هاي إبحقك مكتوبه...الحبك مغفوره إذنوبه
و هيهات إتمسه النار...يا يوم إنرد إنزوره |
|
