مـاعـوفك ...حبيبي وساكن بعيني
مـاعـوفك... كتبت بدم شراييني
مـاعـوفك... عهد مابينك وبيني
يـجـبـريـل الشعر يالطهرت ذاتي
يـنـامـوس الـقوافي وسحر ابياتي
بـمـحـبتك ادركت يحسين غاياتي
الـحـاضر انته وانته الماضي والاتي
حـبـيـتـك ...يمن حبك يزكيني
حـبـيـتك... واظل لاخر سنيني
يـاتـوراة موسى وياصحف داوود
ويـاقـران طـه الاأنـزله المعبود
وحك سر الحجر والكهف والاخدود
احـبك حب يبو الاكبر بلاية حدود
يـالاسـمك... كتابي وكعبتي وديني
يـالاسـمك ...كتبته بكل دواويني
بـفضل دمك تخاوى السيف والمنحر
وشـبـيهك بالبشر هيهات يتكرر
ردت اوصـف جمالك شفت مااگدر
سـحـرني عالم اوصافك يبو الاكبر
يـالوجهك... رسم صورة براهيني
يـالـوجهك... بدر بانواره يهديني
تـولـع بيك گلبي وضامري تلوع
وصـعـدت لـعالمك اتمثل المصرع
شـفت صورة مثلها ماشفت اروع
شـفت راس برمح والجسد عالمبضع
يـالـنـحرك ...محيط الدم يراويني
يـالـنـحـرك ...اسير الهم يخليني
حـوافر خيل حبك جالت بصدري
عـلـى سيوف المودة قدمت نحري
ردت دمي مثل دمك رگبتك يجري
العمر شنهو العمر يااغلى من عمري
عـاهـدتك... احط بيمينك يميني
عـاهـدتك... امامي وانته تدريني
ارتـل واقرا باسمك سورة الوجدان
مـثـل ماعالرمح راسك قرا القران
عـلى كعبة مصابك اسجد باحزان
مثل ماسجد جسمك دامي عالتربان
ومـصـابـك... ينيمني ويصحيني
ومـصـابـك... يصبحني ويمسيني
اعگدت حبل المدامع وية دم جسمك
سـرحـت بعالمك ومصابك وهمك
احـس روحي الحزينة توسدت يمك
احـس دمي نزف عالغبرة مو دمك
مـن جرحك... هتاف الهم يناديني
مـن جرحك... مسيل الدم يوصيني |
