طلب وعتب
يوليدي يالمحجوب...يبني آه يبني
صبرك يذوب اگلوب...بيني آه يبني
يوليدي اجيتك اشتكي يالمهدي يا نور العين
ومنك أريد اطلب طلب وتگلي حاضر هالحين
تنشف دموع الطاهره وتجبّر ألهه الضلعين
ضلع امي المصيوب...يبني آه يبني
تصبر عليه چم دوب...يبني آه يبني
خد الزچيه من الضرب ازرگ غده يا جدي
والعين حمره والضلع دومه عليهه يدي
ومن صوبوا متن الطهر آنه اصرخت یامهدي
وحيدره داحي البوب...يبني آه يبني
تالي بحبل مسحوب...يبني آه يبني
يوليدي سحبوا حيدره وعينه علينه تربي
وينادي يا أم الحسن انتي حياتي وكلبي
حر سيلي لحسين وحسن والحره شمعة دربي
ودمع الوصي مسجوب...يبني آه يبني
يرفسونه من كل صوب...يبني آه يبني
يوليدي لا تنسه الذي راسه انطبر بالمحراب
وانه اجيته وعاينت دمه غده الشيبه خضاب
حضنته وحضني وانتحب وگلي من اشوفك انصاب
يوليدي يالمسلوب...يبني آه يبني
السمك گليبي يذوب...يبني آه يبني
يالمهدي شحچيلك حرت یا فاجعه ويا حاله
عن اختي زينب والخدر ودمعاتها الهماله
لو عن مصایب کربله وفجايع الچتاله
گلبك يضل يلوب...يبني آه يبني
يالمهدي بالمهيوب...يبني آه يبني
يوليدي من داروا عليَّ من كل جهه وكل امچان
وآنه وگفت ابوحدي مثل الأسد بالميدان
ناديتك بذاك الوكت يالمهدي جدك عطشان
ودلالي ضل ملهوب...يبني آه يبني
وزينب تنادي النوب...يبني آه يبني
يوليدي واگف بالوغه وجمر العطش یچويني
ولن الحجر صك جبهتي والدمه صار ابعيني
ردت امسح الدم الجمد لن حرمله يرميني
وبگلي المضروب...يبني آه يبني
لني عليه مگلوب...يبني آه يبني
من طحت يبني عالأرض داروا عليّ الأرجاس
کل رفسه بيه انرفس اندب أخيي العباس
يوليدي طاحولي ضرب والزهره تلطم عالراس
وشيبي بدمه مخضوب...يبني آه يبني
وعليّه ما ضل ثوب...يبني آه يبني
