أبا الغوث أغثنا
وينه اللي يحمي دخيله...عن بته هاي الليله
وليه ولوها...وينك يبوها
يا علي شنهي العطلك عن زينب المظلومه
مو انته للغربه حضرت والينخه تجلي اهمومه
وزينب الحره اشگد نخت يا علي كافي النومه
ذبحو احسينك يا علي وسلبوه حته اهدومه
بكل شده انته تحضر...ولزينبك تتعذر
مو مرمروها...وينك يبوها
يونس گصدته للبحر وخلصته من بطن الحوت
وخليت بتك حايره مهظومه تتمنه الموت
كل ساعه یگصدها رجس للخيمه ويصيح بصوت
یا بت علي وينه علي وبالخیمه زینب ويفوت
ما بین تطرد انذال...وبين النسه والأطفال
بتك سبوها...وينك يبوها
يالذي لسلمان اگصدت ودفنته يا ليث الغاب
ابنك تره فوگ الثره وماكو على جسمه اثیاب
يا أسد خيبر والأسد ما توگف اگباله ذیاب
باچر یبو زینب تره زینب يأسروها أجناب
بتك الما مشيوفه...يدخلوها لرض الكوفه
من سلبوها...وينك يبوها
لو گلب زینب من صخر چان الصخر يتفسر
يا هو ألي شاف الشافته وياهو المثلها تحير
من طاح اخوها تعنته حته تشم المنحر
شافته محزوز النحر وصدره الشريف امکسر
طاحت الحره بكتره...و گامت تشمه ابنحره
مو حيروها...وينك يبوها
المعروف عنك يا علي لليعتنيك بآلام
متعوفه يا حامي الحمه واليگصدك ما ينظام
وزينب شگد صاحت علي دگصد وشوف الأيتام
لا ترضه تسکت یا علي ولا تگدر الليله اتنام
خلاها راعي الغيره...وما عدها چافل غيره
خلاها اخوها...وينك يبوها
عباس یم المشرعه وحسین برض المصرع
وما بينهم يا با الحسن گلب العقيله اتگطع
لحسين ساعه تعتني ويمه تهل المدمع
ومن ترجع لصوب النهر تذوب الگلب من ترجع
کربله اگصد ليها...وشوف العقيله اشبيها
تنطر يجوها...وينك يبوها
