النزلات...
أين عشيرتي
يآل هاشم زینب اكفلتوها...ليش تالي ابكربله عفتوها
انتو مو عادتكم الذل والجفه...وجبتو أم الخدر وام المعرفه
تالي اتخلونها هذا وفه...مو وفه منكم يمن جبتوها
ليش جبتوها وتخلوها ابحزن...بیا ذنب حرمه ابد ما تستچن
الناگه شافت زینب وگامت تحن...وانتو چنكم ابد ما شفتوها
نار اميه بالمخيم تستعر...وزينب برجليها تسحگ عالجمر
امعلمه اطفي النار من الزغر...وانتو یا نار الذي طفيتوها
كون يلفوها أهلها الفاگده...مو يخلوها تضل بين العده
زينب الكم يا ال هاشم والده...وتعبت الكم يمن جازيتوها
يآل هاشم ارد اسمعكم عتاب...زینب بيوم البت فرجة اجناب
يا هلي صاحت ومنها الگلب ذاب...وما تسمعون اللي ضيعتوها
يا هلي صاحت يفرسان الحرب...من امیه شفت مو بس الضرب
يا هلي مشوني بأصعب درب...وهضمتي أهل المثل ضربوها
يا هلي خدري خدر گبل الطفوف...وشاني کعبه اتطوفه يوميه الألوف
وتالي آنه ابلدة الكوفه اطوف...هذا تالي الذي دللتوها
ومن طلعنه الكوفه ساعه ردت انام...ولنها دارت بيه دورات الأيام
زینب انه ویني وديرة الشام...ليش ما للعيله خلصتوها
ولون گلتوا يا هلي عباس وين...ابد ما گصر ابن ام البنين
لچن عالشاطي فده روحه لحسين...وهامته بذاك العمد صابوها
وراح اجيكم للمدينه بیا وضع...وانه حتی ما بگه بعيني دمع
ریت ویه امي انكسر مني الضلع...وجثتي ويه الطاهره ادفنتوها
