الك عشاگ بیها نار ما تطفه...واذا يغفه النجم فد ليله ما تغفه

الك عشاگ ما فد لحظه ينسونك...واليوم القيامه هم ينطرونك
محتملين كل الضيم وعيونك...وكل جرح اللي بيهم ابد ما يشفه

كل جرح اللي بيهم ابد ما یبره...كل واحد اله معشوگ ينتظره
لو جمره انطفت ما تطفه الف جمره...والف حرگه والف ونه والف وسفه

هالعشاگ ينتظرونك من ازمان...وراحو حتی یلگونك ابكل امچان
اظن فد يوم اذا هم شكو ابركان...يطبوله ركض بگلوب متلهفه

لجل ذوله وعشگهم سيدي اظهر...تره نيرانهم كل يوم تتوجر
ويا فرحة عدوهم هم تصير اكثر...ويشمتون بيهم كل وكت كلفه

فرح گلوب عشاگك وارحمهم...تره بس شوفتك يبن الحسن همهم
شيسوون حبك يسري وي دمهم...وتدري بالعشگ نفس العشگ حتفه

چم جمعه تجي ويروح چم مصباح...وكلها اتگول بالجمعه التجي نرتاح
وتجي الجمعه وخيال الحضرتك ما لاح...وكل گلب النزف ما ینگطع نزفه

مو بس تنتظر عشاگ یالمهدي...الك چم ثار چم ضلع الذي يدي
عندك کربله وبيها احچي ما ودي...لأن كلشي جره انته اكثر اتعرفه