طفولة مقتولة
بویه ما اگدر اعوفك...لو اضل اشلون اشوفك
حيرتني الغاضريه...وضاگت الدنيه عليه
لو اضل اشلون اشوفك
قصة رقيه ابكربله قصة عشگ صابه البين
ومن صوبه ضلت تون واحتارت ابين اثنين
ما بين يرضون العده وتگضي العمر يم حسين
لو تمشي وتعوفه غصب وكل ساعه بفراگه سنين
ودها تبگه یم ابوها...لچن عدوانه الولوها
نادت ابدمعه جريه...وضاگت الدنيه عليه
المجروح يا بويه لون يعتب واتلچمه جروحه
يا بويه واصعب كل جرح جرح المفارگ روحه
من يذکر ایام المظن وآمالها المذبوحه
ايضل يكتب اسم الفارگه یا والدي ابكل لوحه
العاشگ الیفگد حبيبه...يترس الدنيه نحيبه
ریت صابتني المنيه...وضاگت الدنيه عليه
یا والدي الفاگد هله حين الذي يتذكر
لو ونته اتلوح الحجر منها الحجر يتفطر
وانه فگدت اکبر عشگ واکبر يبويه واكبر
ابگد الوجود امحبتك واكثر يبويه وأكثر
بویه ضاعت امنياتي...ابكربله ضاعت حياتي
ابحبك انچتفن اديه...وضاگت الدنيه عليه
يا بويه يالفدوه رحت لطباعك القدسيه
بس عيني صدت کربله ذبت حملها اعليه
ابزغري وشلت هذا الحمل بس تظل سالم ليه
تدري برقيه عایشه من اجل هالحنيه
کربله ضیعت دلالي...ابد ما رحمت ابحالي
کربله یعني منيه...وضاگت الدنيه عليه
من صار عاشور وطحت اوداست عليك الغاره
داستني وياك العده وعاشور ذاع أخباره
کتلت رقیه امصيبتك وبس شوفتك كفاره
وتحققت بس بالطشت وجهك يشع بانواره
شيبتك لمن شفتها...الأعادي خضبتها
صحت موتي يا رقيه...وضاگت الدنيه عليه
يا بويه جيت الشوفتك وعيني اعله وجهك تربه
ارد احچي ضيم البالگلب وهموم اصعب غربه
غربة امفارگ کربله هاي الرزيه الصعبه
ومن نبچي يولينه الضرب وزينب تصد چم ضربه
گوم ليها گوم ليها...اشكثر ضربوها اعله اديها
وينكم يهمل الحميه...وضاگت الدنيه عليه
