قصة وفاء
هم شفتو حرمه تفدي البنين...اوودها تضحي بكل السنين
ما تذكر الشبان...تبچي عله العطشان
اودها تضحي بكل السنين
ام البنين الأربعه لمن حده حادي الضعن
گبعت ابهمها ونادته سالم ترد لرض الوطن
یا ضعن وياك اربعه غذيتهم بأطهر لبن
همه اليشيلون الحمل ودمعاتها عالخد جرن
یا حرمه عدها أربع شباب...وهيه التگلهم انطو الرگاب
لجل اليضل حيران...تبچي عله العطشان
اوودها تضحي بكل السنين
وياك شبان اربعه وكت الشدد رفعت راس
بيهم تفاخر یا ضعن وخلي يسمعوك الناس
لو یوم یگصدکم عدو لو حاصروكم ارجاس
یا ضعن بس نادي باسم ليث الحرایب عباس
بس نادي وينه ليث العرين...ينصر عضيده والخوه دین
وما يرد للأوطان...تبچي عله العطشان
اوودها تضحي بكل السنين
عباس تربيتي وچنت بالليل ما عوف المهد
وياه احچي بدمعتي وچنه يريد احچي بعد
امك تگله جابتك من اجل تنطيها وعد
متعوف اخوك بكربله وما بيني وبينه عهد
حاشه يخيب ذاك الربه...وليدي وربایه میخیبه
يا حي گمر عدنان...تبچي عله العطشان
اوودها تضحي بكل السنين
ومن کبر راعي الغانمه وبسم الأخو يترنم
وخطوه على حسين السبط يا ضعن ما يتقدم
ودعت بيده العائله وآنه ادري بيه ما يسلم
وآنه ادري يمشي لكربله واهناك موته محتم
ادري بضعنکم گاصد خطر...وآنه اتاني منكم خبر
كل الضعن حزنان...تبچي عله العطشان
اوودها تضحي بكل السنين
يا ضعن ماشي لكربله تنتظرك هناك چفوف
تنتظرك هناك عده بس لا تفكر بالخوف
يمك المتصده زلم وما تگدر تصده سيوف
يمك شبيه المرتضى بيوم الكلایف معروف
وليدي واعرفه نشمي وشهم...مثل الصميده تهابه الزلم
بالحرب عالي الشان...تبچي عله العطشان
اوودها تضحي بكل السنين
یا ضعن بس خوفي لون العده تلوح الچفين
ما خايفه عله ابني الگمر بس خوفي كله على حسين
ادري العده تستوحده وعليه تدور الصوبين
امنين اجتني کربله يا کربله جيتي امنين
افدي وجودي والأربعه...لبن الزچيه الشافعه
ودمع الوفه غدران...تبچي عله العطشان
اوودها تضحي بكل السنين
