أم الوفه خلف الضعن طلعت تنادي
مُر الصبر عگب الأهل ریض يحادي
اسمع يحادي البين...عندك أمانه حسین

من حده حادي النوايب وشافته أم الگمر
صاحت اوگفلي يحادي ناوي وين ابهالسفر
والده وتدري بحناني وتدري شيبني القهر
وتدري كلش زين بيه فرني دولاب الدهر
يالحادي انظر دمعتي وتحن عليه
اصبر لي بس اشتم نحر ابن الزچيه
واهمل دموع العين...عندك امانه حسين

من وگف ضعن الهواشم والگمر لأمه گصد
دنگ وقبل أديها وعله طلبتها نشد
تگله ربيتك بديه وانه سويتك أسد
حته تحرسلي أخيك وتبگه وياه للأبد
يبني ولون وحده بگه انطي چفوفك
ولو ينچتل وانته تضل ماريد اشوفك
يا مرخص الچفين...عندك أمانه حسين

گلها یا یمه اسمعي ومسح دمعتها التصب
بالگلب خليت اخیي وقفلت باب الگلب
آنه من ادخل معاره يا شجاع اللي يطب
بضربه من ضربات عودي اگلب الحومه گلب
تگله صدگ چنك علي حامي الحميه
لاچن بعد يابا الفضل عندي وصيه
وهذي الوصیه دین...عندك أمانه حسين

عودك تذكره يیمه شکلفك وكت الرحيل
گلك انته ابني واعرفك بالشدد مالك مثيل
زینب امأمنها عندك ودمعه ما ارضه تسيل
چان بس عباس اسمك وهسه عباس الچفيل
وانته فرحت لمن شفت هاذي الوديعه
چنها ابوها المرتضى وامه الشفيعه
وتلگه مثلها وين...عندك أمانه حسين

يمه هاي اختك عزيزه مدللـة آل الرسول
من صدر جدها لأبوها والمهد حجر البتول
من سمع عباس اغضب وناده سمعيني اشأگول
لو سيوف الكون اصدها وشمس زینب ما تزول
لاچن شسوي لو غدر بيه زماني
وگطع چفوفي وبسهم غدره رماني
وراسي غده نصين...عندك أمانه حسين

ودع العباس امه من بعد ذیچ العهود
وناده یا زینب ابشري ابمحملچ حفت أسود
انتي بس امري يزينب واحنه الچ مثل الجنود
تگله يا عباس اريدك سالم اتضل بالوجود
يا خويه يا راعي الوفه سالم اريدك
غيرك بعد يا هو الي وياهو لعضيدك
لو حاطته الصوبين...عندك أمانه حسين