أم البنين اتوصي راعي النوماس...وتگله بيك اتفاخر اگبال الناس
غذيتك ابثدي الوفه يا عباس...بيض وجهي اگبال الزهره

يوليدي تدريني سهرت وربیت...وچم دمعه یم مهدك يیمه هلیت
عباس يا شمعة التضوي بكل بيت...يا وردت روحي المزدهره

عباس يا سبع الزلم بالشده...شنهي الزلم عندك وشنهي العده
لو شفت اخوك حسين ضل بوحده...گبله انگطع وذره وذره

عباس يا زهرة حياتي ودنياي...عباس اعرفك انته نشمي اوفاي
وادريك گبل حسين متضوگ الماي...وما تشرب من گبله گطره

گلها لخلي صولتي مشهوده...والشمس بعيون الأعادي سوده
شمرة علي وزنوده مثل ازنوده...لطبگ السبعه اعله الغبره

گامت تهلهله بفرح واستبشر...گالتله کفوین ونعم يمشکر
یا زود حمزه ويا شجاعة حيدر...يالماخذ نورك من بدره

باس اید امه و گلها يمه نعومچ...عباس وبسيفي ازيل اهمومچ
واختي ادللـه وحگ ارسومچ...واعلگ يا يمه الها العشره