حنان أُم
شفتك فوگ الثره يبني...امصابك يالولد دولبني
بعدك صحت یا جسام...يبني ونحت یا جسام
ریت عيوني معميه ولا طوّل عمر أمك
وتشوفك عله الغبره مرمي امغسل بدمك
لا أگدر اعوفنك ولا اگدر اضل يمك
ولا أقدر اگلك گوم ولا انخه باسم عمك
عمك يوليدي اعله الغبره...والعدوان الحزو نحره
ابعيني شفت یا جسام...يبني ونحت يا جسام
من مروني عالحومه وشفت جسمك على الغبره
يا دمع الأهله اعليك ويا دلالي شيصبره
ذكرت شموعك وعرسك وشگد صعبه هالذکره
يا عرس اللي مثله صار حنته من دمه نحره
جسمك عالغبره من شفته...وعرسك يوليدي تذكرته
والجسمك ملت يا جسام...يبني ونحت يا جسام
ابيوم العاشر ابعاشور وكت عرسك ينور العين
جبت املبس وحنه وآمالي وجروح سنين
وجبت بيدي شمع عرسك لضمهن عودك الهالحين
ولن صوت الفطر گلبي وهذا الصوت صوت حسين
حسين يهل دمعات همومه...والأكبر طايح بالحومه
وانه شطت يا جسام...يبني ونحت يا جسام
ابن الزهره من شفته دمعه عالوجن ساجم
ناديتك يبعد أمك عوف العرس يا جاسم
عمك وحده بالميدان لا ناصر ولا راحم
ودرعك لبسه يوليدي وبيدك جرد الصارم
عمك بين العده وحده...ناصر مو يمه ويسنده
يلي رحت يا جسام...يبني ونحت یا جسام
رحت للحومه يوليدي وجهي بيها بيضته
انصرت عمك يبعد امك وعودك يبني فرحته
لچن حين الطحت يبني وجسمك عالثره شفته
اجت ابالي چم حسبه وهذاك رباك الذكرته
وحگي من اذكر ربايه...امك والدمعه همایه
ابيومك متت یا جسام...يبني ونحت يا جسام
حگي من اذكر ايامك أم وفاگده السلوه
أم فگدت بدرها التام البيه ايامها حلوه
أم وغاب عنها الچان بس بشوفته تروه
ام احلامها ضاعت أم انصابت ابلوه
أم وضايع نجم ليلي...بعدك يا يمه يا ويلي
عگبك ضعت يا جسام...يبني ونحت يا جسام
