يعبد الله الگضه عطشان روحي اعليك عطشانه
لو يمي تضل يبني لو يمك اضل آنه

جربت العطش مرتين يا احزاني يا عيدي
مره بیها ردت الماي وما صح يالولد بيدي
والأصعب عطش فرگاك يا عبد الله يوليدي
ويرويني بالمرتين حلگك الثم ألسانه

تسع تشهر انوگل بيك وست اشهر على التسعه
ابدگات الگلب تغفه وتفز من توگع الدمعه
وبالليل الهج بطرواك واظن صوت امك اتسمعه
عبد الله حبيب أمك عساك اتعيش ويانه

چنت الدنيه متلمني من الفرح يا رجواي
من بحشاي تتحرك واحس ايدك ورجلك هاي
حفيد الزهره شايلته یا اطهر طفل بحشاي
يا جنة عدن يبني وفدوه لأسمك اجنانه

ولمن جيت للدنيه وابوك حسين من ضمك
گام ايهل دمع عينه ومن منحرك يشتمك
شم عطر النبي ابنحرك واتذكر نزف دمك
الهذا ضل ابوك ایلوج وهاجت بيه أحزانه

وهسه عرفت سر حسين وليش ادموعه هماله
بس عفيه صبر صبره اشلون اتجلد وشاله
ويدري ابحرمله امحضر سهمه انشلت اشماله
وعساه انشلت ایمینه ولا اذاك واذانه

حسيت الأرض دارت وحسيت السمه طاحت
واسمعت الصخر يبچي والجن والأنس ناحت
اثاري نبلة الغدار ابرگبة سلوتي لاحت
انذبح وانذبحت احلامي وصارت ظلمه دنیانه

حيرني ابوك حسين من شاف الدمه ابعينه
دم نحرك الحار يسيل بين ایساره ويمينه
شال اعيونه للباري ويگله اخذ بارینه
لمن ترضه یا معبود برضاك امعلگ ارضانه

اشگد اچبير گلب حسين وانته بين اديه دامي
طير ابيض لچن مذبوح وذبحو بيك ايامي
چنت ضامي وتريد الماي ودزيتك على الضامي
والضامي رجع مذبوح وبمهده خله امچانه

ما ضل عندي بس ذكراك وبس ضحكاتك الحلوه
ومن تبچي اذا جوعان وتريد اتنام یا سلوه
ما تسوه بعد دنياي يا عبد الله ما تسوه
الله يخلي الأذاك يبني حطب نيرانه