عبد الله يبعد أمك حبيب الروح يا غالي
اشلون اتريدني اهجع واشوفك ضامي اگبالي

يا حلو الوجه يبني يالچنك بدر يزهر
يا ريحة ورد جوري وياس ورازقي وعنبر
کل یوم اللي تكبر بيه جمالك يالولد يكثر
غصن بان وشطب ریحان یا دگات دلالي

نجم سهیل شمس الله يا بدر اليشع نوره
یا آية حسن يبني يا قرآن يا سوره
محسوده الرباب اعليك والألباب مسحوره
كلها اتسولف ابحسنك وآنه خايفه ابالي

اتصدق گمت يبني من اعيون هالوادم
واقره آیات یم راسك وانته بالمهد نایم
واگل لحسين يدعيلك ويدعيلك واهو صایم
اوكت افطوره هم يدعو وبيك الدنيه تحلالي

ستة اشهر عشتها وياي وعشتها وياك يا سلوه
تنام وتگعد وتبچي واشگد ضحكتك حلوه
واگلك لو ردت ترضع الرباب اتروحلك فدوه
وانته امکيف وفرحان وانه الفرحانه للتالي

لچن فد ساعه مدري اشصار ودارت وسفه أيامي
لن عبد الله اشوفنه ذابل خايف وضامي
عبد الله يريد الماي يمنعه الكوفي والشامي
شنو اللي صار حاچوني وشوفو لوعتي وحالي

مو حگي اموت اعليه واشوف اخدوده ذبلانه
واشفافه تريد الماي شتلت ورد عطشانه
يمهر الزهره گلي اشلون تخلي الزهره حزنانه
حفيد الزهره گلبه ایفور بعد یا ماي يحلالي

گلت لم الخدر عمته یا مولاتي اخاف اعليه
اشوفن غارن اعيونه واصفرن يويلي ایدیه
شيليه الأبوه حسين والعوده الولد وديه
خل يطلبله گطرة ماي واخاف الماي چتالي

وزينب جابته لحسين واهو مخنوگ بالعبره
يبوس ايديه الزغيرات ويشم نحره ویشم صدره
وجابه للعده وناده ستة اشهر طفل عمره
تمنعونه العذب ميصير دمع امه بگه ایلالي

آه يا حرمله الغدار آه يا سهمه الميشوم
ذبح نحر الطفل وامه وجده اوالده المظلوم
ظل من نحره يجري الدم ومن نحر السماء ادموم
ومن نحر الأرض ينبع ضل ايام وليالي

يبني دارت الدنيه بيه وگلبي حس ابشي
لا اگدر بعد اگعد ولا اگدر بعد امشي
العالم كله صار اظلم واحس روحي افگدت كلشي
اوحدي جيت لثيابك ويا ريحتهن اتسالي

ألم اهدومك وابچي واطشرهن واگوم ابچي
واحاچیهن واگول اشصار ليش ويه الهدوم احچي
واريد اشچي ألم گلبي بس ألمن اگوم اشچي
اشبيه عبد الله گلولي وادور ایمیني واشمالي

يا ريت انگطع نحري ولا شفت انگطع نحرك
اشلون اتجاسر الأذاك ما عاين زغر عمرك
طفل ستة اشهر وعطشان ابسهم يرويك ويغدرك
عساه انشلت ایمینه چتالك وچتالي

يبني اعيوني ما تقبل تعاين طفل من بعدك
وخدي ايضل على التربان لو خدي على خدك
وليل انهار راح اگعد واهزن يالولد مهدك
وخلها اتگول عني الناس الرباب اتهز مهد خالي