النزلات...........
ورضيعه بدم الوريد مخضب
يبني عبد الله ارد اسولف والألم فاض وطفح
همي ما واحد الشافه ولا گلب مثلي انجرح
ابني ضامي وراد ماي وبس عله الماي انذبح
آه يا لوعة مصابه وآه لوعة کربله
حيرتي صارت چبيره من بده يغمى عليك
تبگه يمي تموت ضامي ولو رحت اخشى عليك
صدگ من السهم صابك من الألم طلعت اديك
من الالم لو ردت تشبگ حسین ابن عقد الوله
اكسرت گلب الأرض لمن شبگت عودك يالرضيع
والسماء اتفطرت من شافت الرزء الفجيع
آه يا صبر الحسين اشلون من شافك صريع
وهوه گبلك چم صريع الشاف جثته امرمله
آنه بالخيمه واحسن گامت الدنيه تدور
وأشم ريحة دم رگبتك ودمعي عالوجنه يفور
چنت اشمن عطر نحرك هسه منحوره النحور
منين اجتني كربلاء امنين اجاني حرمله
گامت الدنيه تدور وآنه ادورن بالخيم
انظر اطفال الزغار ويذبح بگلبي الألم
ابني ما شابع حليب ابسهم غدار انفطم
وانفطمت من الحياة وعيشي بعده لا حله
كون الحگه وما اظلن اهناك ارضعنه الحليب
شفتو عاشگ يضل عايش وراح من عنده الحبيب
ابني مجروح ابرگبته وبس حنان امه الطبيب
راح اظل بالشمس ابچي وبالمصاب امعلعله
رمله تبچي یم ابنها وليله تنحب يم علي
وانه منتظره قدومك يا شمس بيتي وهلي
وینه یا زینب تأخر حسين ما جابه إلي
اترست مهده من الورد من عاينت مهده خله
گمت اهز ابمهد خالي واحچي ويه طير السعد
انته هم عندك وليد ومنك اخذو هالولد
انه دگات البگلبي انتظمت ابهزت المهد
روح يا طير السعد دور حبيبي بالفله
روح شوف ابني حبيبي بعده شابگ والده
لو اديه ذبلن اوگعن من سره ابجسمه الرده
روح كل لحسين اجيتك من رباب الفاجده
اتگول وينه ابني تأخر والمدامع هامله
