آمال وآلام
ابسهر ليلي يعبدالله...انهدم حيلي يعبدالله
من اشوفن مهدك الخالي...بعد يا عين تغفالي
انهدم حيلي يعبدالله
انه امك يعبدالله چنت كل ليله احچي وياك
وانته تسكت وتسمع وتفتح يالولد عيناك
وتأشر بيدك وتفرح ومن تبتسم يا محلاك
ومن تتعب الوليلك وتنام ولحظه ما أنساك
اظل يمك يعبد الله...يبعد امك يعبد الله
انته ومهد اگبالي...بعد يا عين تغفالي
ألوليلك لحد متنام ويم مهدك اضل اني
اخافن تفز نص الليل يا يمه ومتلگاني
اخافن دمعه تهملها يالعايش بوجداني
ابني وما الي غيرك واحد ما الي ثاني
گلت تكبر يعبد الله...واضل افخر يعبد الله
وهذا اللي شغل بالي...بعد يا عين تغفالي
لچن وسفه الأمل ما صار وانه شضل بعد بيه
لانه الماشفت وجهك حتى اتصبر شويه
ولانه الشفتك وضليت بجالك يبني محميه
عبد الله شوکت ترجع ضحكاته وبواچیه
اذا ترجع يعبد الله...ارد اهجع يعبد الله
واذا كل هايه آمالي...بعد يا عين تغفالي
يا وردة فرح ذبلت ويا دمعة حزن هلت
شگد انتظرتك روحي يبني وساعه ما ملت
لچن تالي اگطعت بيها وامك يالولد سلت
تگل للناس صبرچ وین واگلهم کربله شخلت
الدهر شاهد يعبد الله...ولا واحد يعبد الله
بگت عيله بلا والي...بعد يا عين تغفالي
ضيّعت الفرح يبني وبس برجعتك ألگاه
ورافگت الحزن بعدك واذا ينساني ما انساه
من فجر الفجر ثاني هوه ویایه وانه وياه
وتعبّته بحزن روحي وخليته تهل عيناه
انه احچي يعبد الله...وهو يبچي يعبد الله
حزني ودمعته تلالي...بعد يا عين تغفالي
حتى الحزن مل حزني وبگه بس ذكرك ويايه
اتمنى الزمان ایعود وبس احچيلك احچايه
شدعي على الفرات اللي ذبحوك لأجل مایه
الصابك ليش ما فكر بعدك وين منوایه
شكثر عمرك يعبد الله...وتطب گبرك يعبد الله
وگبرك هوه چتالي...بعد يا عين تغفالي
