فطام السهام
من رحت لليوم...عبد الله يبني
ما اجاني النوم...عبد الله يبني
ست اشهر وذبحوك...وأُميّه ما روّوك
عبدالله يبني
يعبد الله بعد عينك بحيره و گاعده وحيدي
عيني على الدرب تنطر ترجع ليه يوليدي
ادري بالعده ذبحوك وادري رحت من ايدي
وادري ماتت البسمه وعاشور الأخذ عيدي
لاچن الدلال...عبدالله يبني
ينتظر لا زال...عبدالله يبني
يل من عيني حجبوك...واميه ما رووك
عبدالله يبني
يعبدالله اسلي الروح بسمك واهمل المدمع
واگلها انتظري يا روحي چم يوم وألچ يرجع
وگمت أگعد بنص الليل ابوکت اللي چنت ترضع
واضل انطُر نجوم الليل نجم يخفه ونجم يطلع
لون ادري ابهاي...عبدالله يبني
ما عشت دنياي...عبد الله يبني
يالحرموني وحرموك...واميه ما رووك
عبدالله يبني
ليش ابلا ذنب حرموك مني وآنه حرموني
وخلوني ألوج اعليك ليل نهار خلوني
واتذكر ليالي ارباك يبني ومنخطف لوني
من اسهر ليالي طوال وابد ما تتعب عيوني
ابسمتك ارتاح...عبد الله يبني
وعطرك الفواح...عبدالله يبني
وغصبن علیه اخذوك...واميه ما رووك
عبدالله يبني
يَلَّه اگعد يعبدالله امك تانيه يله
لو عمري اعيشه وياك لو ماریدن الضله
يالما أحمل ادموعك من تبچي يعبدالله
اجيك واهز کاروكك اسم الله اعله اسمك اسم الله
وهسه دمعي يسيل...عبدالله يبني
ما تفز بالليل...عبدالله يبني
صابوني ما صابوك...واميه مارووك
عبدالله يبني
من شالك ابوك حسين عينك چانت عليه
بوجهي تريد تتروه وما تتروه بميه
چنك تدري يوليدي ما ترجع بعد ليه
چا ليش اقبلت تمشي وتخلي اضلوعي محنيه
تخلي امك ليش...عبدالله يبني
وتعتني للجيش...عبد الله يبني
حسدوني لو حسدوك...وامیه ما رووك
عبدالله يبني
چنت دومي اضمن بيك من الناس من العين
وبيك البيت مستانس واهل البيت مسرورين
وعودك من يرد للدار متلهف يجيني حسين
عليك يگوم ينشدني يم عبد الله ابنچ وین
وتالي من رد بيك...عبدالله يبني
انشدته آنه اعليك...عبدالله يبني
يا وسفه ما ردوك...واميه ما رووك
عبدالله يبني
