حلم مذبوح
يوليدي حاچيني...ما تسمع ونيني
شنهو السبب يا مذبوح...أمك تخليها اتنوح
يعبد الله ويه جيت الليل يجي ذكرك عله بالي
وتجي بساتك الحلوه واحسك گاعد اگبالي
اجي اركض عله امچانك مچانك شو طلع خالي
اثاري نسيتها روحي وذكرني الدهر تالي
ابهالحاله ترضالي...يوليدي يالغالي
عاده الأبن سلوت روح...وأمك تخليها تنوح
اذكرتك يالولد غایب واصفگ گمت راح براح
يا نجم انطفه ضيه وضاع ويه النجوم وراح
ادور بالسمه نجمك وانشد يبني گلبي الناح
واگله یا گلب گلي نجم وليدي شو ما لاح
گلي يدلالي...نجم ابني الغالي
ويه النجم ما شوفه يلوح...وأمك تخليها تنوح
شو كل النجوم تشع وكلمن ينظر لنجمه
والمحرومه بس آني شنهي السبب يا يمه
تدري الوالده تهجع من وليدها تشمه
تريده بكل وكت يمها وهيه بكل وكت يمه
عبد الله يا شمعه...ما تكفي الدمعه
دم العله الخد مسفوح...وأمك تخليها تنوح
لون غاب النجم يبني يطلع من بعد مده
لچن نجمك يضي عيني خلّص وكته واتعده
شكثر أتنه يعبد الله مو صبري خلص حده
بعد راح اگطع الظنه واگول الراح شيرده
راح اگطع الظنه...وما فارگ الونه
ونت حمامات الدوح...وأمك تخليها تنوح
چان الليل لو چلچل اعاين وجهك اليزهر
السمه يضويها بعيوني وگلبي ابهالضوه يستر
وچنت بالليل اسولفلك واشيلك عالصدر وافتر
اناغيك وتناغيني وكل ليله الفرح يكثر
ووياك كل ليله...مستبشره العيله
وما ادري هالفرحه تروح...وأمك تخليها تنوح
لچن ما دامت الفرحه وشفتك يالولد دامي
وخليتك عله صدري و گامت ترجف اعضامي
وگلت ما انطي عبد الله ويدفنونه وهو ضامي
بس هلیله اريدنه واعيدن بيه احلامي
چنت ادعي كل ليله...نعشي انته التشيله
وگلبك لموتي مجروح...وأمك تخليها تنوح
