على الدنيا بعدك العفا
يوليدي الأكبر...يا شبيه المختار
بيك انه افخر...يوليدي ليل نهار
يلي وفيت الدين...فدوه العمر لحسين
يبني يالچنك محمد فرگتك صعبه عليه
لو ادور الدنيه كلها ماكو مثلك عالوطيه
يالغصن ميال طولك وانسگه بدمعة حميه
يا مره المثل ابني عدها جده حماي الحميه
تشبه محمد...ووصافه كلهن بيك
يبني يفرقد...کون الباري يخليك
يبني يتعب سنين...فدوه العمر لحسين
يبني هنيالي يالأكبر انته ابني وانه امك
ريحة الزهره اشمها حين يوليدي اشمك
وحين اشوفك يبني تغضب دم علي الكرار دمك
وبيك يوليدي اشوفن غيرت العباس عمك
بالصبر چنك...ابن الزهره المظلوم
سالم عسنك...يوليدي تبگه دوم
يا دمعة البالعين...فدوه العمر لحسين
تدري يالأكبر يیمه چنت اساهر ويه مهدك
بس ألولي وبيه أهزن أي وحگ الهادي جدك
وللفجر سهرانه أبگه وانته نايم يبني بعدك
ساعه اشمك ساعه اشيلك ساعه احط خدي اعلى خدك
كل ساعه اشيلك...وافتر يوليدي الدار
يمضوي ليلك...أُوجهك يشع أنوار
انوار ابو الحسنين...فدوه العمر لحسين
وبين ما تحچي ويه ابنها ولن بچي النسوان يكثر
ولنها تسمع صوت زینب خويه مو گلبي تفطر
ثاري أبو اليمه ينادي يا هو يحمي العيله یگدر
ليله صاحت گوم حارب هذا وكتك يبني لأكبر
رضعتك وفایه...وكت الوفه هاليوم
ثبّت ربایه...واگصد یوليدي الگوم
ذكرهم ابصفين...فدوه العمر لحسين
يبني هذا ابن الزچيه الخلته يمنه أمانه
چان جده يقبل أيده لچن ما انصف زمانه
چانت الزهره تگله حسين مثل امه حنانه
والله لو يقبل يالأكبر بين اديه استشهد آنه
لو ادري يرضه...انه انزل للميدان
وجفني يغمضه...بيده حسين العطشان
عاشور اجانه امنين...فدوه العمر لحسين
يبني قاتل دون عودك وانزل الحومه وانصره
ذکر العسكر بحيدر وكربله سويها حمره
ولا تفكر بيه يبني بس ابوك حسين اذكره
انه اتمنه يالأكبر افدي دون حسين عشره
افديله نحرك...وافديله يبني الروح
افديله عمرك...وللزهره من تروح
اذكرني ذاك الحين...فدوه العمر لحسين
