زینب حايره وحيرتها اشد حيره...تنخه بغيرتك يا صاحب الغيره

تنادي انه اختك گوم يا عباس...واذا متگوم تتشمت يخويه الناس
شگول اعله العمود الصوبك بالراس...وجفن عينك عله اختك بعد متديره

امل زینب يخوها وامل هالأيتام...كله بيك يا نشمي يبدر التام
چم عين التناطر طلعتك متنام...تريد اتصد بدرها المالها غيره

بس بشوفتك تتنومس النسوان...وترتاح اليتامه وترتوي الرضعان
چم عطشان چبده وياك چم عطشان...واخوك حسين يصعب علي تصويره

يشوف اطفال بس تتنطرك يا حيد...گطرة ماي من ايدك يخويه اترید
وانته اتأخرت والنهر موش ابعيد...وگام پلوج اخوك وحيرته چبيره

کسر گلبي من اسمعه يگول چا وينه...مو من عادته يتأخر اعلینه
وعلى دربك يبو فاضل شبح عينه...واسمعه یگول وينه وشنهي تأخيره