الفصل الثاني: النزلات.....
زيارة الحسين عليه السلام
اسبوع اتاني ترجع ومني المدامع هامله
حتی چم نشده انشدك يالزرت طف کربله
مفارگ وتدري المفارگ گلبه ما يهجع ابد
مفارگ العيشه الاحبها باطيب واطهر بلد
مفارگ اللي هزني حبه ويه هزات المهد
وچنت ليل انهار يمه وكله ويگلي هله
لا تلوم الدمع خله يجري ويجرح العين
وبالعتب گلبي الوعه وألچم جروح السنين
آنه فارگت الحسين وشنهي عمري ابلا حسين
الدنيه ظلمه خلاف عين حسين راعي المرجله
يالزرت طف ابو اليمه يم ابو اليمه شلگیت
ما شفت ایتام يمه ومن شفتهم ما بچیت
ما گلت يا ريت ما جيتك ويا ريت انعميت
ولا شفت جثت حسین اعله التراب امرمله
ومن رحت للتل يزاير ودمعت عيونك تسيح
ما شفت حرمه غریبه تگوم كالساعه وتطيح
امچلبه بيها اليتامه وهيه کل ساعه تصيح
حسين يحسين اعلى بختك تدري بيه امدللـه
ما شفتها تريد تمشي للمخيم لو ترد
ما صحت يمها يزينب مصابچ يفت الچبد
ما شفت عين العقلية اليا کتر چانت تصد
للگمر لو للصمیده لو لبن عقد الوله
آني ادري عيون زینب چانت تصد عالنهر
ومن تون احلف يزينب چانت تذوب الصخر
ومن رحت صوب الشریعه ما صحت یم الگمر
گوم یا ناطور خدر الطاهره الخدر انوله
كافي يا عباس صبرك وكافي سكته وكافي نوم
هاي بت الزهره زینب یم ابو اليمه تحوم
حايره وشنهي تسوي بس تطيح وبس تگوم
تنتظر گومتك الها والوجود اتزلزله
اگعد اسمعها تنادي ومنها مفطور الگلب
گوم يا عباس گوم واگلب الدنيه گلب
اختك آنه شلون ترضه اوگف بساحة حرب
حسين ما اگدر اعوفه وخايفه اعله العايله
من اعوف حسين وحده خاف يا ذونه العده
وخاف جرحه يلچمونه من يضل ابوحده
ولو اظلن يمه يا هو لليتامه الشارده
واليتيم الراح أبيه غير زینب ياهو ألــه
