يخويه اشلون اگصدك دربك امنين...وآنه مدوهنه ومتحيره بثنين

حرت مدري اشوفك مدري اعوفك...يخويه حسين حيرتني طفوفك
إذا جيتك دگلي اشلون اشوفك...واذا اعوفك يصير الگلب نصين

تراني اتحيرت يابو الصبر بيك...إذا جيتك اشيلك لو اخليك
لو اگعد بصفك بس اناغيك...واگلك يا بعد روحي يالحسين

باصرني يخويه وشوف حالي...تراني جريت دمعي الچان غالي
عگب خدري اشوف الذله تالي...ترضالي بهضم يالگلبك احنين

احیرن بيك لو بعيال واطفال...انشف دمعتي لو دمك السال
لو اگضي العمر خویه اعله هالحال...يمن ریت اخذ عمري اخلافك البين

اجيك امنين يالجسمك رميه...وإذا شفتك يخويه اشلون بيه
انوح اعليك لو تنحب عليه...لو نتناوب الحسره والونين

دجاوبني بروحي وعوف نومك...تره شاب الگلب لمصاب يومك
صدگ مطروح ومسلبه اهدومك...تمنيت العمه ومتشوفك العين