النزلات...........
همسات عشق
حسین دگات الگلب بسمك يبو اليمه تدگ
وحبك سره ويه الدمه وهالحب تملك كل عرگ
صدگني يبن المصطفى وحچي الگلب كله صدگ
وجتنه نار امحبتك وذبلنه يحسين العشگ
مرات حبك سيدي چنه فجر لمن يطر
يتناغه وي لون الورد ويا محله نسماته التمر
ومرات حبك بيه ألم وبیه وحشه تنحر كل صبر
ومرات تچوي امحبتك وتصير احر من الجمر
يا سيدي الحب مو سهل والعاشر الحب بهذله
وانه ابتليت ابهالمرض وگالولي كل طب ما أله
بس تربتك يبن النبي تشفي الأمراض المعضله
ومن جربتها تربتك زيدت علتي کربله
تربتك زيدت علتي يا سيدي وما ضل دوه
لو نظره من عينك إلي لو تگطع اعليه الهوه
یا رحمة الله الواسعه ارحم جسم بالهم خوه
وخليني يمك سيدي وخنعيش يا روحي سوه
هنياله کلمن جاورك وينظر الگبتك كل صبح
ويداوي عشگه ابهالنظر ويذب ملح فوگ الجرح
ويخلي ايده اعله النحر ويصيح حاضر للذبح
ابشرع العشگ يبن النبي لازم يصير اعله الرمح
طبع اليحب طبع اليحب یگضي حياته امدولبه
لا عقل يبقاله ولا راحه وحبيبه امغربه
يا سيدي الحبك صدگ چا لیش دوم اتعذبه
يالدولبتني امحبتك يحسين يا سيد الإبه
