کربله یعني ركض فوگ التراب...کربله یعني مصاب ابصف مصاب

کربله یعني ألم يگطع الروح...کربله جروح وجروح وبس جروح
کربله یعني مره ثكله تنوح...وعايشه ابلوعه واسی وحرگه وعذاب

کربله یعني طفل خايف اهواي...لايذ ابأمه وهي مشدوه راي
کربله عبد الله ضامي يريد ماي...وتالي يتروه ابدمه نحره المصاب

کربله یعني عرس بين السيوف...والعروس ابعينها المنظر تشوف
جاسم العريس ما بين الصفوف...امحنه من ادماه وسف خير الشباب

کربله یعني شبيه المصطفی...امگطعه اوصاله وبدر وجها انطفه
ويمه ابوه ايصيح عالدنيه العفه...بعد عينك يا علي يبن الأطياب

کربله یعني أخوا ماله مثيل...يعني خوة گمر عدنان الچفيل
امگطعه اچفوفه ودمه راسه يسيل...والعيون مصوبه ودلاله ذاب

کربله یعني وفه ماله حدود...يعني غيره ويعني رايه ويعني جود
کربله چفین مگطوعه وزنود...واخو ايصيح عضيده ما يسمع جواب

کربله یعني حُسين الكبرياء...نایم اعله الگاع واتسيل الدماء
میة ألف آه لرزية كربلاء...حسین معشوگ الگلب فوگ التراب

کربله يعني ابو اليمه طريح...کربله یعني جريح ابصف جريح
کربله یعني مره تگوم وتطيح...ومن تطيح ايحل على الناس العذاب

کربله یعني اسيره اعله النياگ...اتعوف جسم اعضيدها ويبدي الفراگ
اشكثر رادت تندفن برض العراگ...بيه جسم احسينها وداحي الباب

کربله یعني بنات امدللات...وبعد والدهن بگن متحيرات
فاطمه تکل الرقيه حسين مات...صوبوه ابسهم بيه اثلث شعاب

کربله یعني حزن أم البنين...الما بچت لولادها وتبچي لحسين
وتدري بالعباس لا يسره ويمين...وفدوه لبن المصطفی زاچي الأنساب