في رثاء الامام الكاظم :
مرمي ابجسر بغداد...يا كعبة الوفاد
مرمي ابجسر بغداد...يا كعبة الوفاد
وينهم فرسان غالب ما دروا عن هالمصيبه...ضمدهم موسی بن جعفر بالسجن قاضي نحيبه
لو اثاري ما وصلهم خبر عنه برض طيبه
يا بني عدنان لو تنظرونه...بالسجن مطروح يجذب ونينه...سمه فت احشاه وانخطف لونه
قوموا انظروه اليوم...مرمي ابجسر بغداد
وسفه یا ضيم لقيته يا ضيا العالم ونوره...بالسجن نحبك قضيته بالمذله والكسيره
وسط طاموره امغيب عن احبابك والعشيره
عزوتك يا حيف ما دروا ابحالك...سم هالعدوان فطر دلالك...وقت نزع الروح ما حد اقبالك
يا كعبة الوفاد...مرمي ابجسر بغداد
اتزلزلت بغداد من طلعوا ابسلطان المدينة على حماميل أربعة من السجن نعشه شايلينه
امغلل ابقيد ابعباته ويح قلبي لافينه
یا خلق شفتون بالدهر كله...ميت برجله اقياد صار بأي مله
في وليه العدوان...مرمي ابجسر بغداد
صاح لمنادي شماته ابموت شمامة الهادي...والخلق طلعت ابدهشه قاصده صوت لمنادي
هذا يتفرج وهذا مدمعه بالخد بادي
والسكك بالناس فايضه الصوبين...كل من ايسايل هالمنادي وين...عن هالمصيبه وين أبو الحسنين
ابنك يداحي الباب...مرمي ابجسر بغداد
بالذي صار اسمع اسليمان واعملها سياسه...وقال وين اهل الفخر واهل المروه والحماسه
اشلون هالسندي الرجس للدين ويا الشرف داسه
هذا ركن الدين وآية الرحمن...بالعجل جيبوه ليه يا غلمان...لا يسيخ الكون بالانس والجان
مهجة الزهرا اشلون...مرمي ابجسر بغداد
بالعجل جابو الجنازه على سكينه وجهزوها...وحي ذاك الشوف منهم لو شفت من شيعوها
حفت الشيعه ابنعشه والبيارق نشروها
شیعوه اشلون حي ذاك الشوف...حرم ويا ارجال حول نعشه اعكوف...يلطمون الروس والدمع مذروف
وبكثرة الصيحات...ماجت أرض بغداد
نخوه یا باب الحوايج وانته للعالم وسيله...حاجتي ينفرج همي واحتظي ابحاله جميله
وابقى في امعزه وسعاده والبلا ربي يزيله
يالذي باسمك دارت الافلاك...والذي ابمثواك تعكف الأملاك...سيدي هاليوم عبدك ابرجواك
ياللي ابضیا نوره...تزهر أرض بغداد
