في رثاء العباس
يا حرم بالمشرعه العباس طاحت رايته...انقطعت اكفوفه من ازنوده وفضخوا هامته
عند باب الخيم ظل يبكي ويصك راح ابراح...آه يشایل بیرقي فوق الثرى اتقنطر وطاح
وصرت مثل الطير مكسور السواعد والجناح...وانطوت راية نصرنا يوم طاحت رايته
وسمعن النسوان صوته وصارن ابضجة وحنين...والشعور امنشره والكل يهل دمعة العين
ولفت سکنه اتصيح ابوفاضل يبويه حسين وين...لو شرب ماي او نساني هاي ما هي عادته
من سمعها جذب حسره والحزن بالقلب زاد...وصاح شوكتنا افتلت والعدو نال لمراد
دشي الخيمه يسكنه والبسي اثیاب السواد...اللي ترجينه يجيب الماي فظخوا هامته
واقبلت زينب تنادي يا كفيلي اشها الخبر...قال يختي الكافي الله حامل الرايه انطبر
وانهتك يمخدره سترك وانا ظهري انكسر...وانطوت راية نصرنا يوم طاحت رايته
كافلك يختي على المسناة جثته امجدله...واستعدي عقب عينه للمصايب والبلا
وابشرى ابذل او هضم وارکوب ناقه مهزله...ومجلس ايزيد الرجس لازم يزينب دشته
قالت ان كان البطل عباس فوق المشرعه...قوم ياخويه ابعجل خلنا نروح انودعه
ونغسل الدم عن اجروحه وعن الرمضا نرفعه...بالكت اعضيدك يابو سكنه ترد ارويحته
قال يختي اشلون من بعد الذبح روحه اتعود...ولكفوف امقطعة والراس مفضوخ ابعمود
ایسي يمخدره من كفيلك ما يعود...شفته يختى امطبره ابضرب الهنادي جثته
