[ موشح في مصرع الحسين (ع) ]
عجّت العصرين واسوَد الفضه...من طحت يحسين يبن المرتضه
من طحت ويّاك طود الدين طاح...اوهب حمر يحسين بالكون الرياح
اوعجّت العصرين لاچن بالصياح...سيّدي والعالم اسود ابيضه
لون ما شبلك وهو زين العباد...يظل من بعدك اوبي تحيه البلاد
هوت فوگ الواسعه السبع الشداد...والدهر يفنه اومنيته اتگوّضه
ريت سيف الگاضيه يفني الدهر...اوللبريّه التلف والموت الحمر
اولا يبو اليمّه يبن سيد البشر...دمّك اسيوف الأنذال اتفيّضه
آه ياريحانة الهادي السليل...بالهجير اعله الرمل تمسي چتيل
اوفوگ صدرك والظهر تلعب الخيل...آه وعظامك اتبات امرضرضه
يمن جسمك روح والعالم جسم...چیف عگب الروح ماجسمه ایعدم
آه مهرك من طحت فر للخيم...يظن غيرك ياشهم يستنهضه
بالمباني ما وجد غير الحرم...لوه اعنانه اوسدر لاچن انهظم
وگف عد راسك يصاهل ياشهم...ایحسب حي اوبيك يحسين ايحظه
من وجد مابيك للنهضه ومه...ایّس اودمعه على اخدوده همه
خضب ناصيته المطلب بالدمه...اوجذب حسرة موت ياويلي اوگضه
سيّدي وسبوطعش غير الأصحاب...من أهل بيتك مصابيح اوشهاب
منهم الكل شاب لاچن عالتراب...ما اختط الشعر آه ابعارضه
اوكل فرد منهم الك روح ابجسد...بين ابن عم وابن اخو اوخي اوولد
اشيظل بيك اوشبلك اتشوفه انفگد...منّك اوعينك صريع اتلاحظه
سيّدي كل ساعه تحملّك طعين...شاب چنّه البدِر من عنده الجبين
مهجتك والعين والمهجه ظنين...وانته روحك عالمراهف معرضه
سيّدي اوراحت يمينك والشمال...غيثها الوسمي اوبحر جود اونوال
اوتسمع امن العطش تتلاعه الاطفال...اوما تظن اگلوبها اجمور الغضه
سيّدي امن اذكر الحال البلطفل...سال دمعي اوصحت بلساني انشچل
اوعينك اتشوفه يبن سيد الرسل...غارت اعيونه اجفونه امغمّضه
گلبه والعطّاب من حر الضمه...يضطرب لاچن على روحه انغمه
دون عذب الماي روّاه الدمه...طوّگو بالسهم وبجيده مضه
سيّدي لا باس من شان الزلم...تچتل اوتنچتل موت العز شهم
لاچن اطفال اليغذّيها الحلم...ما تعرف اصحابها أمن المبغضه
والطفل يحسين ما يجني الوزر...اويستعيبون الطفل چتله الكفر
شلسبب يحسين دمّه ينهدر...بين اديك اشلون وانته اتلاحظه
ياعجب من صبرك اوكل العجب...بيه باهه الرب ملايكة الحجب
افرض اعليك الچتل امره وجب...لاچن ابهتك الحراير لك رضه
