[ القصيدة الفائزة ][التي انتصرت بالفوز في المباراة التي جرت بين شاعرنا (رحمه الله ) والمرحوم كاظم دچه: القصيدة الفائزة ]

يا اصول الدين يا من فرعك اليّمه التِسع...ما يجازي امصابك النوح ولا فيض الدمع

خمسه اصول الدين بالكون والفروع الخمس...ما سواهن بالعوالم كل فرد منهن شمس
غير ابو السّجاد ماجد ما حواهن بالانس...من تفصّلهن تجدهن ذات لحسين او طبع

ثبت وحدانّية الرب لاچن ابعز وحدته...ما شبه صمصامه صمصام ولا مثله فته
مهجة الكرار لاچن للنبي ريحانته...وتر بالدارين مجده او بالمجد غيره شفع

او ثبت لله العدالة لاچن ابطيب العمل...ونچتل لا للرياسه لاچن الدينه انچتل
أدرك ابدّمه الإسلام گصد عز او أمل...او بزغ ماشبهه ابسمه الدين بدر ضيّه يشع

او ثبت للهادي النبوّه ابشاهد او معجز او شان...راسه بالقرآن يلفظ لا چن ابراس السنان
یا صريع الاسمع الناس كلام امن اللسان...وأرهب اگلوب الصنادید جدیل او منصرع

ما ثبت نص الأمامه للوصي حامي الحمه...حتّه راسه انگطع وعليه بچت عين السمه
ظل ثلث تیّام عاري او غسّله فيض الدمه...او چفّنه الذاري ابهبوبه او دفنته إگطع النبع

او ثبت ميعاد النبوّه ابيوم ميعاد الطفوف...محشر الدارين لاچن بالكتايب والصفوف
او حظه ابجنّات الشهاده لاچن ابنار السيوف...او جرع من چف المصيبه چاس مر ما ينجرع

او ثبت للباري صلاته او أرغم اخشوم الكفر...حين خر لله ساجد عالأرض من المهر
او صلّت اعليه المواضي البيض ورماح السمر...او صابه المثلّث ابگلبه او من عظم ظهره طلع

لو ثبت فرض الصوم لله ابصومه وبظماه...وفطر جمر العطش گلبه لاچن افطر من دماه
اوعلم الناس الابايه من حميته ومن اباه...وباها بيه الباري الاملاك بالافلاك السبع

لون ما حجك تعوفه او تصل وادي كربله...ما ثبت للبيت حجه او فرض صار اعله المله
اليروم الشرف بالدين او يتمنه العله...يركن الحاير ضريحك بالمصايب ينفجع

لون ما تدّي زكاتك وبحمر دمّك تجود...للزكا ما ثبت وجدان يظيغم بالوجود
كل حزن ينگطع حبله او يضمحل او ما يعود...ماسوه حزنك يمظلوم حبل ما ينگطع

للجهاد ابخطّة الكون لون ما تنتهض...للجهاد امحال يثبت بين هالعالم فرض
فوگ صدرك تعدي الخيول يبو اليّمه او ترض...يا عجب والحال صدرك عرش للدين او منع

هاي اصول الدين خمسه او للأصل خمسه الفروع...اضلوع الك يحسين وأنته گلب ما بين الضلوع
يضمحل شرع النبوّه يظن طاغوت الجموع...ما دره منصور بحسين او منصور الشرع

ويحسب أدرك ابدمّك فاجر الشام المراد...لا ولا چن خاب ظنّه والعذاب اعليه زاد
اصبح امصابك ابشانك يعلن ابروس الاشهاد...حيث ما بالكون غيرك شانه بالعز مرتفع

مال هالدين او اصوله الخمس وفروعه الخمس...تلفي يالمهدي الشرعنه من گبل ما يندرس
انته مثل الشمس لا چن غيم ما دون الشمس...ما تهب او تجلي الغيوم يظيغم یا ورع

لون ما صدرك الواسع ينشحن غيض او غضب...او گلبك الصبرك يمله او تسل صمصام الرهب
ما تهيج او تطلب الثار او تستافي الطلب...او تحصد ابصمصامك الروس مثل حصد الزرع

يا تره العالم وجوده بالملاحم والظلم...لون ما وجدانك اصبح عدم يا حر يا شهم
صدگ وعدك فرض بالكون على الباري او حتم...لا جن اليمته يعودك يامن ابصبرك طمع

حلّلوا حرمة دماكم آیبن سید الرسل...حتّه واليمته دماهم تستبيحه او تستحل
تدري ابيا سيف جدّك يالمغيّب منچنل...ابسيف طاغوت السقيفه اللّي وكز بيه الضلع

طفل ما رحمولك الگوم يحر او یا نفل...حاشه يبن الحسن گلبك يرحم الخصمك طفل
چم وچم راحتلك ارواح شباب او چم شبل...دون هذا الدين بالطف سيّدي عشره او سبع

چم رضیع ابمهده لـمّن عالخيم هجمت الخيل...رضّته ودعت نجيعه فيض عالغبره يسيل
سلبوا او نهبوا ولا چن ردّوا الحال العليل...جرّدوا منّه اثيابه او خذوا من حدره النطع