[ موشح خطاب العقيله للهاشميين ]
آه يشبول المنايا وشابها...اچبودكم جمر الهظم ما ذابها
چم وچم ناديت حي اعله الفلاح...حتّه من الناس ملّتني الرواح
ایّست منهم اودمع العين ساح...مثل سح الغيث من اسحابها
گتله امهلني يدمعي لا تصب...شمّتت بيه الحواسد والنصب
گال مو بيدي المسيل امن الگلب...واظن زینب فجعته بمصابها
گتله أي والله يدمع العين جود...وكرب الوجناة واحفر بالخدُود
لا تفيّض دمع خذّم بالچبود...على امصاب السلّبوها احجابها
من مثل زينب وهي بت الوحي...والابو الكرّار والجد النبي
تنهتك واتصيح ماظل من ولي...يالعلي والله على غيّابها
ما بگت منهم يمين اوبيه چف...عظم سالم منكسر عظم السلف
یاوسافه اركنت كلها اعله التلف...والمنايا انشبت بيها انيابها
چالگطه المرعوب من يگطع ابليل...هجّت ابنات الوصي حامي الدخيل
هاشمي اولا هاشمي ايعذّب الخيل...يفرغ اعدوها اويخلّي ارچابها
آه لاون عتب زینب تسمعون...باللّطم يكرام رمّيتوا الوجون
اليمته ثاره لابن حیدر تخلّون...وشربت اعليه چاسها ونصابها
ياهلي المطرود بحماكم يمن...وما مثلكم بالمله ایجود اویمن
ياهلي يا من شمايلكم يمن...ابحور لاچن السفن طلاّبها
ياهلي الخلّه يستروها العمام...اوما عله الذلّه نواظرها تنام
ياهلي هاي الارامل والأيتام...تعتب اوماتسمعون اعتابها
ياهلي لوچان عتبي اعله الصخر...حن على حالي وتصدّع وانفسر
ايّست ودموها تجري حمر...موته اهلها اومن يرد اجوابها
اوردّت التفتت لعد جدها الرسول...نادته اوعبراتها تجري وتگول
يبو ابراهیم اعله صدر ابنك تجول...خيل عدوانك وهو اعله اترابها
ردت التفتت النوب اعله البتول...صاحت وعبراتها شبه السيول
يـمّي يم الحسن ما بين الخيول...ابناتچ اوحرکت الگوم اطنابها
ردّت التفتت النوبه اعله الحسن...يبو محمّد نادته ذب الچفن
هاي اعاييلك يواليها انولن...اوطمع بيها يا نفل سلاّبها
ردّت التفتت لعد وادي السلام...نادته لحّد يحيدر يضرغام
هاي اعاييلك مثل سرب الحمام...هايمه ابوديانها وشعابها
ایّست هالنوب من عدهم الكل...بالهظم گبعت اوصارت على الذل
ردّت التفتت العبّاس النفل...حيث من طيِبه كفلها اوجابها
نادته يالرف على راسي لواك...يبو الشيمه اوجيت من طيبه بحماك
يبن ابوي الفحل ياليث ابرضاك...بالطفوف اختك ابّين اجنابها
