بالولايه احسين من ودّع حلف...يملك أمر التاج يو يفنه السلف

گالها ابن الحصّد الذات الگوگ...چذب غيره بالزمط مثله صدگ
نور منّه الجور والباطل زهگ...امیّز المكنون درّه امن الصدف

ماجد امره الماضي او گوله الفعل...اوغيثها الوسمي اعله هالعالم لم يهل
اللّوم فاته اوجاوزه كل العذل...شرع بالعز وامسه ما دونه الشرف

اتحفه جدّه مواريث الرسل...اوملكه ما يملك أمن الله الكل
اوگالّه يحسين ودموعه اتهمل...حاذر اعله الدين يانعم الخلف

يبني يامن شخصك العيني انسان...اوسيّد الشبّان بوساع الجنان
يبني ياريحانتي تدرچ زمان...خالي من عدنه اوحدك بي يا وسف

يبني واعليك الدهر واهله جميع...تتّحد والخصمك الظالم تطيع
اوتشتري الدنيه ابثمن غالي اوتبيع...دينها اوبدلّت عسجدها ابصدف

ويلها او آنه الها والباري رغيم...بيها يوم اشفع عليها اصبح خصيم
يبني دونك مرهفي اتّخذه نديم...اورايي عسّالها اتّخذه ولف

وادّرع يحسين لاچن بالصبر...واغزي يبني مثل مغزاي اببّدر
اولا يروحي اومهجتي تبقي اوتذر...وثن الاّ او تنشبه ابسهم التلف

حيّه جدّه ابما عليه ورد امر...ميتسم لاچن اعيونه اتدر حمر
ايمِن ياچد عليّه بالگبر...يَچد وتظمني گبل ورد الحتف

يجد من دمّك اومن لحمك نبت...لحمي اودمّي اوعلي عينك بچت
ياتره ياجد علي غدري صفت...كلها والرايات للفتنه ترف

لاچن استرجع اوناده ابشر يجد...فرحتك سبطك اولعيونك عبد
خيمتك بعدك اوللخيمه عمد...طود شامخ ما يهز ركني الرجف

لمضي ابأمرك ابصمصام العزم...يجد وارغم من بني حرب الخشم
ما أرد حتّه اصك وجه الحتم...يو أصيرن للنبل ياجد هدف

من بعد ما ودّع الهادي اوعزم...عالمسير ابلیل بزمول الحرم
معتني مكّه بسير اعله الجدم...والنجايب بين اديه تعدي اوتخف

ماطلع مورب شبل حامي الدخيل...من وطن جدّه النبي ابظلمة اللّيل
لا ولاچن ما تود نفسه الرحيل...بالنهار ايخاف زینب تنعرف

يخطر اعله البال محجوبة الدين...غير ابوها اللّيث امير المؤمنين
يوم حادي عشر من بعد الحسین...زینب الگوم اعله محملها تحف

حايره لاچن على صحّه اوفكر...ثاكله لاچن على حلم اوصبر
والهه لاچن على عفّه اوستر...ما أجل بالكون من زينب واعف