هل يدمعي هل شهر عاشورها...حزن هاشم وآل امیّه اسرورها

آه ياويلاه پهلال الحرم...سيف جور ابنيت بالكون اوظلم
اسكتت بالنوح والون واللّطم...اوحتّمت عالناس تدمي اصدورها

انته يهلال الحرم ناعي اليصيح...وانته المحورب المحروب الجريح
ما تگلّي اشصار گال امسه ذبيح...علّة اكوان البريّه اونورها

گتله الله اعليك ياهذا الهلال...ما تسولفلي اوتشرحلي الحال
يازمل من المدينه ابليل شال...هجن ثگل السلطنه اعله اظهورها

گال ماتدري ولا سمعك سمع...ياحموله ابليل ماجدها طلع
هذا ابن بِنت الّذي أبأمته شفع...احسين آ يحسين يا منحورها

ضاگ اعله ابن الحصد روس السباع...سدر دنياه الفضه اوكل الاوساع
شاف ماله محط ساعد على الگاع...غير تربة شرف الفه ایزورها

او آمره جدّه يلوح الراحله...اويظعن ابهاشم اوكل اعويله
يبني مالك مقر دونك كربله...اهناك اهل بيتك تحيي اگبورها

واتحسب مطرود من يد مبغضه...لا وحگ جدّه وابوه المرتضه
لاچن امر الله والمگدّر گضه...اومن يفر من حكمته اومقدورها

المثل سيد شاب فردوس الجنان...خايف اوبالواسعه ماله امان
گطع لهل اعراگها اجنود الزمان...وآل اميّه الاجهرت بفجورها

اولون ما تبعثله الوادم اعهود...ما وصلها اولا عليها امنح الجود
الك يبن المصطفه امجنّده اجنود...بالعراگ اعليك تربي اصبورها

اوهاي عاده اوجاريه اوشان الچريم...يدفع امن اليندبه ذلّة الظيم
يعطف ابكل وكت حتّه اعله الخصيم...حيث يمناه ما تشف ابحورها

اوعذلته الوادم گبل ما يرتحل...عيّه ابي الظيم لن يقبل عذل
مثل مجره السيل تفديله الرسل...بالرسايل والكتب واسطورها

بین ما هجنه ابفيافيها تسير...وافده الحر بالف طاغوت اوشرير
راد بحسين الرده اويرميه يسير...لابن مرجانه العبد مغرورها

نادته زينب يبن عز الگصير...ما ابهالنيّه سوه الشر نسم خير
مايبو اليمّه ترد من هالمسير...ترجع الطيبه اوتجيم ابدورها

يبن خير العمل حي اعله الفلاح...غدر من كاتبك شوف العين لاح
چنّي ماشوف الرواح ابهالرواح...تذهب اوتصلي الچبود اجمورها

اوثقل ظعنك يالمصيّت بالكرم...بين طفله او طفل يحسين اوحرم
او گبلتك يحسين مابيها رحم...اوخاف يسلمنه الدهر بشفورها

واهل بيتك واخوتك بيها الضمد...والاصحاب اطياب يوفون العهد
لاچن انظرهم جليلين العدد...او گبلتك ما ينحصه جمهورها

اوأمرك المبعوث بي چنّه التبس...اوعازم انته اعليه لا چنّه انعكس
اوخاف منشور النصر عنّه انحبس...اوميّه بينه تفتك امنشورها

من سمعها استعبر اودمعه همل...لاچن اتبسّم اوبيها ارحب اوهل
آنه اخوچ الشبل من ذاك الفحل...واسمي لگلوب العده خاطورها

تذلّين اوعزّج ابيمناي سيف...اورمحي ويّه الموت يازينب حليف
بالحرب للوحش باني الها مضيف...مربعه والهام وچر اطيورها

لا يهولچ هول بوجودي اورهب...وآنه ابن طاعون طغوان العرب
سيفي اجهنّم اوعدواني الحطب...الويل من الهيبها وسجورها