[ موشح للرضيع (ع) ]
چیف پهنه العيش ويطيب الورد...اوطفل ابو السجّاد مفطور الچبد
لاهنه العيش اوفلاطاب الشراب...اوگلب طفل احسين من العطش ذاب
يارزيّه ابكربله واعظم امصاب...صارت اعله احسين من ينطي النشد
گلت چتل انصار ابو اليمه صعب...سهل گالولي اوبي لا تعتجب
گلت چتلة جعفر اوعون الندب...لا يگلّولي يمن مالك رشد
گلت گطع اچفوف عبّاس البدر...لا يكلّولي خطيت ابهالفكر
گلت چتل الاكبر اليفني الصبر...لا يگلّولي فلا نلت الگصد
گلت چتل الجاسم اليعمي العيون...لا يگلّولي سهل چتله اويهون
گلت ياهو گالوا اليجلب الكون...ذبح عبد الله الرضيع البلمهد
حين اجت زینب الواليها اتحمل...بين اديها ابلوج عبد الله الطفل
نادته ودموعها دم اتهمل...طفلك ابگلبه العطش ناره تجد
ذابله اشفافه اويلوع اويضطرب...غدت عين ابعين من عنده نصب
ببس ثدي امّه ولا گطره ایحلب...ما تشيله اوللعده بيه اتگصد
شال طفله احسين لاچنّه انحنه...اوكثر همّه اعليه واشتد العنه
برگعه اوللگوم ياويلي اعتنه...بالطفل ليهم وصل راعي المجد
اوربت ليه القبايل والصفوف...اوحدر كتره مختفي شيءٍ تشوف
اظهر الهم خشف لامثل الخشوف...نور من تچهب عليه عنّه تصد
صاح ابوالسجّاد يجلاف العرب...آنه وهذا الطفل جاني ذنب
ذاب جمر العطش من عنده الگلب...ما ترحمون الطفل گطرة ورد
حنّت اگلوب الطواغيت الاشرار...گالوا الحگ ويّه ابن حامي الجار
للكبار اذنوب ماذنب الزغار...اوشتّموا ريّسهم الجلف العبد
اوصار ما بيناتهم لوم اوعذل...وعزموا ايرحمون عبد الله الطفل
هجس ريّسهم الميشوم النذل...اوأرّب امن الفتنه وحشا ترتعد
اوضاف من الفتنه بالعسكر تصير...اوصاح ياحرمله اوحيّاه الشرير
وین سهمك ريحنه من هالزغير...گبل ما بالعسكر الفته تشد
گال ماحن يوم گلبي حرمله...اولا دمع عيني علي امصيبه هله
الاّ من صبت الرضيع ابكربله...اوسال دمعي وانصدع گلبي الجلد
عيّنت جيده اليزهر چالنجم...بين ادين الضيغم احسين الشهم
اونفذ من گوسي العبد الله السهم...اولوّح الجيده الوريده مرد
