نادت الحر الشهاده الطيّبه وهيه الاجر...لا يفوتك خيرها اليوم يلمذّهب يحر

يمن ماتدري العواقب بالزمان امجرّبه...منها شر لاچن اومنها خير وصل العاقبه
خابر ابحر الريّاحي وبأذاته الطيّبه
دخل للجنّه او تنّعم...عگب ماچان ابجهنّم
طلع من الكوفه اجرم...من وصل للطف تندّم
حين شاف احسين حاطت بي جماهير الكفر

عرض امرين اعله نفسه دار جنّه اودار نار...اوگال يانفسي اختاري من بنه الدارین دار
گالت اعله الجنّه هيهات وحگ الله اختار...لوتوزّعني المواضي البيض ورماح السمر

لأبن سعد الحر لفاله اوجاوبه ابغيض اوغضب...شلّك اویه حسين نيّه گالّه نيتي الحرب
من سمع لحسين سانف لاچن ادموعه تصب
مستحي اويرشح جبينه...امهبّط وللگاع عينه
شبچ يسراه ابيمينه

وگف لاچن وگفت الذّل بين أيادي الامام...سلّم اعله احسين وحسين عليه رد السلام
گالّه يبن البسيفه ميّز الحل والحرام...آنه اللّي جعجعت بيك الهالوادي الخطر

ومنعت ظعنك رجوعه ياشبل حامي الحمه...اوتايب الفيتك ترالي توبه عد باري السمه
نعم ناداه عنّك اعفيت يراعي الغانمه
جرّد الماضي اوتچنّه...اوللعده مغضب تعنّه
يالرياحي حامي عنّه...اليوم مرواحك الجنّه
اوعين روح العِين يالحر ليك تربي اوتنتظر

جاوب ابشر يبو اليمّه وارجو ترخصني گبل...حملت اصحابك اونفسي اتريد عالگوم اتحمل
اوّل انصارك اوما بين اياديك انچتل...اوما حسبت الگوم يحسين على چتلك تجر

جدم للكوم الرياحي اوصاح يجلاف العرب...الله جنّبكم رحمته اوعجّل اعليكم غضب
مالكم ينذال وحسين عليه الكم طلب
يا سواد الوجه منكم...ما ظلم يشبه ظلمكم
اصبح الشافع خصمكم...هذا ابن حیدر علمكم
اسليميتوه العدوّه ومسه معدوم النصر

حين شاف الگوم بيها ما نفع وعض اويفيد...شد على اصفوف المداريع ابعزم الله الشديد
بین ما بالدرع يرتع مرهفه اويبري الحديد...الاحته اعيون الشهاده اوطاح من متن المهر

عجّت اعليه كل بني ارياح عمامه واخوته...اومن بعد فگدان الحسين اوللحر شالته
وبعدوه عن المعاره وبضريحه دفنته...والعشيره الهاي تنراد اوتنفع ما تضر

ظلّت الما الها گوم اولا عشيره اولا عمام...احسين واولاده والاخوه للرماح اوللسهام
اوبالهجير ابخطّة الكون على الغبره ينام...وتعده اعليها المغاوير اوترضخها الشگر