[ موشح للانصار (ع)]
أكرام ما غير الشهاده اترومها...وبرضاها زارها محتومها
اكرام ما تلبس سوه العز ثوب ذل...اولا مدامعها من الخوف اتهمل
اولا يشيب الها الدهر وفرت نسل...اشبول غاب اخضابها أمن ادمومها
اكرام لا بالمال لاچن بالاعمار...دون من بيهم من الخوف استجار
جامعه الضدّين انوار اونار...اسيوفها النار الانوار ارسومها
ابحور لامن ملح لاچنها سماح...كوثريّه او رودها يحيي الرواح
ارياض ساحلها اتحمل منها الرياح...عطر ينثر عالبريّه انسومها
اعيون ترعه الناس ما زال اوتروف...تجبر اوما تكسر اتأمّن الخوف
عوّدتها اطباعها البسط الچفوف...تود تطعم للوفود الحومها
ما سبگهم ماجد ابفعل الجميل...اولا مثلهم بالمله ایحامي الدخيل
اوجوه للتايه يشع ضيها دلیل...ما تغيب ابسمه الدین انجومها
لون ما شخص الشرف بيها انفرد...والمجد والفخر ويّاها اتّحد
مارمتها الناس بسهام الحسد...اوصار دمها للنذال اسهومها
هذا شان الناس للراجع تضد...اوما تزل تختار عالحر العبد
لو دهمها الهم غدت ليكم تجد...صارخه اوتجلون عنها اهمومها
وهيه تتورّد الدم منكم مثل...ما ترد بالماي عطشانه البل
يا معجزه السامِرِيهم والعجل...بدت من البيوت غيها الگومها
ما سمعناها اولون الها أثر...أبده بيها الكون ما بين البشر
نعم الهم فاينه اوشر انتثر...اعله الگلوب اوزاد بيها الچومها
آه وبـچبدي اوحدر ضلعي جرح...بالوجع ما زاله اعليّه يلح
گتله ودموعي اعله وجناتي تسح...يادوه اليبريك يا مالومها
اعيه ياجرحي مِنَك فكر الطبيب...واعتذرني او گال لومك ما يطيب
ما تجيب اشلون بصرك ما تجيب...ما النيزانك تخمد اضرومها
گاللي جرحي الممتد بالفؤاد...ابد ينفعني دوه اویایه اوفاد
لاچن ارجه الطيب من رجعه ابمعاد...رایه هجريه الحمد جيدومها
اربعه ابعسّالها العسجد تحف...عز مهابه اونصر رابعها الحتف
من يرف اظلالها حان الرجف...بالبطاح الواسعه او بحزومها
