[ في سفير الثورة الحُسينية مسلم (ع) ]
جد يراچب للمدينه ابليل واصبحها فجر...اوصيح مسلمكم يعدنان رموه امن الگصر
ما الكم والدهر يكرام عليكم مصطلت...سيف من دون البريّه كل زمان اوكل وكت
باسم اوشامت اوفرحان اوعبرتكم تكت...وله عدكم مال غدران او يطلبكم وتر
ما تحجزه عنكم الناس ولا دعوه تفل...اوللحرب هدنه اوهوانه والصوايح تنعذل
والحگوگ الها سواني والذهايب تنفصل...اوللجروح اقصاص وحدود اوللعافي الاجر
ما تطلبون الفريضه امن الدهر عند الشرع...اوتنشرون الدعوه دیوان ابمحضر وابجمع
والذي تنگص يمينه على الحگ اوتنگطع...ما عليه باس اوملامه لاچن الحگ منغدر
آه ما للحگ يغايب شاهد اولا بيّنه...غير طبرات السيوف الماضيه اوطعن الجِنَه
الخيل يهل الخيل مسلم فتك بيه ابن الزنه...اوما هگوتي انتم بالوجود اودمكم ينهدر
لاتسرجوا الخيل يكرام اولوحوها مرج...يبطي عالصارخ المضيوم تره شد السرج
يفتك ابمسلم عبدكم نغل مرجانه العلج...اولا عليه مسلم بالعراگ يحن اوینّغر
آه من اوجوه العراگ الما والله اتخجل...اوما الهم غير الگبائح والفضايح من عمل
بايعوا مسلم اولاچن من وفد ليها النذل...نكثوا البيعة امن الدين اوركنوا للكفر
وتركوا بالكوفه مسلم لا نصير اولا معين...اويلتفت نوب اليساره اويصد نوبه لليمين
هایم اوما يدري وجهه بيه يتوجّه اووین...خايف اومرتجف مهموم اومعدوم النصر
حتّه جابنّه اجدامه الدار من عند الديار...گعد لاچنّه المصيبه ابمهجته وجّت النار
طلعت ام البيت شافت مسلم ايدير الافكار...وگفت اوما دونه خلّت باب منزلها ستر
نادته اشعندك يهذا واجف ابعتبة الباب...هبّط اعله الگاع راسه سكت مارد الجواب
طلب منها شربة الماي اوجابتله الشراب...شرب لاچن اعله رسله تم وهي ليه تفتكر
نادته لـمّن شرب ماي يهذا امضي الهلك...ما اجوّزلك على الباب تجيم ابگعدتك
انچانك تبغي الضيافه دونك اسعه ابضيفتك...يو الك حاجه علينه گولها اولو تنحدر
صاح يالحرّه ولاچن مدمعه عالخد سچیب...ابهالوطن مالي عشيره اولا گرابه اولا صحيب
اولا أهل عندي اولا بيت ولاچنّي غريب...هلّچ اتجيريني ليله واحده الطرت الفجر
