حين شاف احسين الاكبر شابچه اعليه السمر
جذب حسره اوفاض دمعه اوضاگ من عنده الصدر

يبني يالاكبر افراگك صدع من عندي الچبد
لچن هنّاني اوبجحني اوهوّن اعليّه الوجد
حيث بيك الدين كسره انجبر والدين الگصد
اولو جبر دیني سروري ما يضر حالي الكسر

نوب اهنّي بيك روحي اونوب اعزّيها اوأحن
اوتاره اتبسّم اوتاره اسح دمعي اعله الوجن
بار ما بالكون واحد للأبو مثلك ابن
يبني مجزاتك على الله اوعظّم الحالي الاجر

اوكلّما گلبي يگلبي اعليك يتجلّد يريد
تكثر اجروحه اوونينه ساعه عن ساعه يزيد
اوكلما عيني امنعتها امن البواچي ما يفيد
رغمن اعليّه دمعها يكت لاچنّه جمر

اشلون يالاكبر چنتلي سيف ماضي ابچف سبع
درگ ما تحجز طبرته اوطاس يمنعها اودرع
يابدر بيتي المازال اوبالظلمه يشع
ریت ما باللّيل يسفر من بعد ضيّك بدر

اشلون يالاكبر چنتلي رمح ما شبهك رمح
يصدع اسنانه الجلمود اوبالطعنه وكح
ياشمس غالب عمامك حين يبديها الصبح
من كثر نور البوجهك ودّعت شمس الظهر

اشلون يالاكبر چنتلي سهم ما مثلك سهم
لو رميته ابجبل جيرون تصدّع وانهدم
العفه اعله الكون واهله بعدك اوريته ابعدم
عالم الوجدان كلّه اوأصبح الدنيه الحشر

اشلون يالاكبر چنتلي لوه اوما شبهك لوه
حين عالجمهور تجبل جنح بيرغها انطوه
الك يالاكبر ابگلبي جرح ما يبري دوه
حتّه آنه اوياك امسي ابلحد وبساحة گبر

عفّتك عفّة الطيّار يميمر يا شهم
اومن عزم حمزه المنعوت استارثت العزم
ياشبه جدّي اورحمته ما يالاكبر تنرحم
رحمتك لاون مسلمين ولاچنها كفر

اعليك يبني اعيون اليهود مدامعهن جرت
واحنت الحالك يشبلي والگلوب اتفطّرت
يبني وسيوف المسلمين الجسمك وذّرت
امتّك يالهادي هيهات ذنبها ينغفر