موشح لشبيه المصطفى الاكبر عليه السلام
چبد أبو اليمّه اوليله افّادها...نهض للخيل اونزل لطرادها
ما بگه اويه احسين من بعد الانصار...غير سبعه اوعشر واطفال الزغار
زاده الاكبر اولیه طرفه استدار...نوبتك يبني اوحل ميعادها
يبني يالاكبر يضيغم يضرغام...للحرب ما دون گومك والعمام
حتّه يبني لا يگولون اللّئام...المنيّه الغير شبله رادها
اوما عَلَي فرگاك يانور العيون...هيّن اوفگدك علی گلبي يهون
لچن روحي امرادها خالج الكون...اومگصدي احتسبك اليّه امرادها
يبني يالمالك ابهالعالم قرين...اوشبه جدّي النبي البي متونّسین
واليحب الله ايخدم يبني الدين...اونفسه يهديها اعله دینه اوفادها
يبني شمّر عن يمينك والشمال...وانزل الخطّه اوياحي هالنزال
يبني الشيطان وجنوده الانذال...تضمحل الدین گصد أجنادها
جاوبه الاكبر يوالد ياحسين...لا تحشمني على نصرة الدين
يچن من عندك يبو اليمّه العين...ابسيف عزمي اوللكفر وگـّادها
وارجو یبن المرتضه سید الرسل...گصد من عندك يبو اليمّه اوفضل
أرد اودع امّي اوتودّعني گبُل...ما تودّعني العده بحدادها
آمر احسين ابنه اوريحانته...ايروح ليها اوطب عليها ابلامته
هوت فوگه روحها من شافته...اوعاد ليها العگل حين العادها
اونادته ودموعها گامت تصب...ياهله يرويحتي اوريع الگلب
وين يبني اتريد گال ابغي الحرب...والحرب للحرب فريضه اجهادها
وآنه يمّي ادري ابحشاچ اومطلع...تضطرم نار اوعلي جرحچ وسع
لچن يمّي لو علي شفتي النبع...اوصار جسمي للمواضي اغمادها
عاد ياليله اويمّي اتمهّلي...بالشهاده النالها شبلج علي
علي لا تبچين لاچن هلهلي...لو افراگي المهجتچ مرّادها
يمّي لا تبچين من بعدي قرب...اولا تظل عينچ مربیه اعله الدرب
يمّي آنه ابنج ولاچن للحرب...عوض عنّچ وآنه أعز اولادها
والّذي أمّه الحرب ولها ابن...ما تطعمه العسل وتشربه السمن
لچن عالطبرات ترمي والطعن...اوتعلن ابمجده اعله روس اشهادها
الچ حگ والرب عليّه وجبّه...حملچ ابشخصي اومر ووفج والريه
وآنه حگـّي اعليچ يمّي الطيّبه...روض روحچ شوفتي وورادها
يبني يالاكبر يبو وجه الحسن...حچيك انشبني ابنشاشيب الحزن
تظل حيّه امّك عگب عينك تظن...لا ولا چنها تظمها الحادها
يبني يالاكبر وشوفك عالتراب...ويهنالي العيش والتذ بالشراب
سواد عيني بعدك ایصدّ الشباب...أبد لاچن سال عيني اسوادها
يبني يالاكبر عسنّي لاشفت...يومك اوفگدانك الگلبي يفت
يبني محسوده اعله وجدانك چنت...اوشمّتت بمّك گلب حسّادها
روحي يالاكبر مجدّه اعله الرواح...عالسيوف الماضيه اوطعن الرماح
ریت ما دونك يسلواني الرواح...تطلع اوتفداك كل اجسادها
يبني يالاكبر اوياريحانتي...دونك اتدرّع ابچبدي اومهجتي
يبني وجدانك عمود الخيمتي...اوتهوه الخيمه المهوه اعمادها
يبني يالاكبر يراعي المعرفه...هون لوداعي ياشبه المصطفه
يبني من بعدك على الدنيه العفه...اوريت من بعدك عدام اجادها
يبني يالاكبر يضيغم الغيور...لا تعذبني بفرگاك وتجور
يبني سيفك نار وبوجهك النور...لاچن النار من النذال ارمادها
يبني النور الك ياليث الشره...ولي النار اعليك امسجّره
يبني من بعدك فلا والله الكره...يمر بعيوني ويطول اسهادها
يبني يالضي الشمس منك خجل...مالدمعي ايناسب الفگدك همل
يبني يالبدماك داويت العلل...امن الديانه اودينها واعبّادها
يبني ياشمس الضحه اوبدر التام...اوداعت الله عليك من عندي السلام
يبني اتباريلك اچبود العمام...دونك اعله الموت شد اچبادها
لاح میمونه اوسفر عن ساعده...رجف الزانه اوسل امهنّده
من بعد ما ودع امه اووالده...شد علی ابطال الحرب واجيادها
اوكالت اهل الغدر اصحاب البغض...هذا داحي الباب من گبره نهض
حين صاح ابخطة الكون الأرض...ماجت اودگـّت اعليها اطوادها
صاح بيها البين وغراب العطب...اظن تفنه اليوم من سيف العرب
مرهفه اجهنم او عدوانه الحطب...مالك اونار الحرب وقادها
رمحه اجهنّم اوصمصامه الحتم...والومض سيفه المنافس تستلم
تكثر ابياسه الشجاعه والعزم...حين تتكاثر عليه اعدادها
بین ما اجره الحمر جري السيول...وبيدر اعله الواسعه ابدان الچتول
وفرغ امن الفرس امتون الخيول...اوجنّب السبق الغوجه اوكادها
جدت اعليه الشهاده اورادته...اوسر گلبهه الوصل روحه اوسرّته
عارضه العبدي اورماه ابشفرته...اوهوت شمس الضاحيه امن اشدادها
صاح لـمّن طاح عالغبره طعين...وزّعوا جسمي ابمواضي المشرچین
عادني جدّي اوسگاني يا حسين...وِرده ما أضمه بعد مورادها
