*{{خويه چلمات الشماته - نعي -}}*

خويه چلمات الشماته جارحه...وْجيت ٱذكرك شنهو گِتْلي البارحه

١/البارحه مَرّت عَلَي مثل الحلم...وآنا بيك مأمنه وما أَسْتِهِم
يَلّلي مِثلك ما تجيب أم الزلم...عليك تسوى شْما تنوح النايحه

٢/يالي مثلك ما تجيب الأمهات...و ٱخو مثلك إلي ما صار لْخوات
كل دلال وياك ياعباس مات...من شفت هالرايه يمك طايحه

٣/البارحه شگتلي أذكرك لو نسيت؟!...وانت حاشه بخوتك ما قصرت
آنا لو ما إنت للطف ما إجيت...گتلي نمشي وآنه گتلك رايحه

٤/گتلي إمشي وصدگ ما مرني الهوه...و عْلى راسي كاسر فياي اللِّوا
وگتلي روحي وروحك يموتن سوا...شو عفتني بين هاي الصايحه

٥/شو عفتني هْنا يا كَشَّاف الترب...لا كفيل ولا ضره بديرة غرب
خويه حملي ثجيل وبْعيد الدرب...لو عتبتك يا چفيلي مسامحه

٦/والله ياعباس لوني محيره...ما عفتكم لَمّن ٱتوارى الثرى
أبني بيت ٱحزاني وسط المگبره...علّي ليله والصبح ما صابحه