اليريد ايلوم خله ايلوم بيه...سودني غرامك مو بديه
ابضميري و روحي...تصيح اجروحي
سودني غرامك مو بديه
_____________

انه من اصياري لگيتك جاري عشگ بعروگي
احس بوجودي گبل مولودي چنت معشوگي
ملك احساسي وشميم انفاسي و دمعتي و شوگي
ابعراوي اجدورك اجي العاشورك اشدن طوگي
ماريدن ثواب ولا جزيه...اريدن بس رضاة امك عليه
ادگ وابچيلك ... واصيح ادخيلك
سودني غرامك مو بديه
_____________

اضل يم بابك وانوح امصابك دمعتي ابعيني
بين اعلامك ولطم خدامك اگضي اسنيني
انه ابتعزيتك وضوه احسينيتك اشوفن ديني
اصف ابدارك نعل زوارك شرف يكفيني
اريد اعليك ما تنشف دمعتي...واشد احزام چفيت خدمتي
واشيل الرايه ... ابعزه المشايه
سودني غرامك مو بديه
_____________

اضيع ابدونك وحگ اعيونك تراني بحايتك
دخيل اعضيدك عبد لعبيدك اضل ابصايتك
اشيلن مايك و وزع چايك عبد بقرايتك
امش اذنوبي وادوفن ثوبي ابنعل مشايتك
شرف ماشوف اكبر من خدمتك...ونعم الله عله افضالة نعمتك
وصيحن دارس ... ابحوزة عابس
سودني غرامك مو بديه