چم يعقوب عينه عليك سچابه...ويا يوسف الزهره لمثلك طول غيابه
چم يعقوب الك ظل يسچب العبره...وعينه لطلعتك يابن الحسن تبره
طالت غيبتك يا يوسف الزهره...وصبرك ما طفح يالمهدي خنيابه
يا للعجب صبرك صابر ليمته...وسكته ليا وكت يابن الحسن سكته
بس انت اﻷمل واﻷمل بس انته...وتدري يضيع حگ لماله طلابه
كاتلنا الهظم يابن الحسن واللوم...وعلينا العداوة بكل نوية تحوم
من دم شيعتك شبعت الگاع دموم...والكل هد علينا وفزع ذيابه
ذيچ هي العداوة والذبح والسيف...واحنا بغيبتك نفرك براح الحيف
گروا عيونا وفسر ظهور الطيف...خل سيفك يهيج وينزع گرابه
غيرك ما بگه وچم ثار الك چم ثار...ثار الدار لـــو ثار لــوگع بالدار
لو كسر الضلع والعين والبسمار...لو نار الغدت بالباب لهابه
نار الباب تسعر تنتظر وعدك...تطفيها وتحل بيدك جتف جدك
انت لبلجره تدري وخبر عندك...بعده يفور دمه بصحن محرابه
يابن العسكري وبعده الطشت بعده...وبذاك الطشت متگطعه چبده
ياهو لمنع دفنه يم گبر جده...ولسه بالنعش اثار نشابه
هاي دموم اهلك من عصر عاشور...ما بردت بعده بالطفوف تفور
چم چف انگطع واچم نحر منحور...وچم عريس من جم رگبته خضابه
يالمهدي ومصاب لشاب منه الراس...يا راس انذبح لو يا جسد ينداس
لصار عل ابو اليمه ما يصير بناس...آه يا حسين آه يا جمرة مصابه
يا جرح لمخزن وابد ما يلتم...عماتك خذوها عللهزل للشام
آه يا بت علي شلون بخرابه تنام...وقبر البلخرابه ما بره اصوابه
أبوذيه:
*ما يردن*
مشن للشام كوه ما يردن...وليالي العز يا زينب ما يردن
رقية بيوم گالت ما يردن (ماي اريدن)...رخص عباس روح الها هديه
