بالخرابه اشما تسلهم عيني
تنلـچـم مدلـوله وتصحيني

1ـ هاي تستاحش من الظلمه وتنز
وذيچ تغفه وجرح يلچمـهـا وتـفز
وتگعد ام عبد الله (كـاروكه) تهز
يگـلـهـا مـا در صـدرچ إترضـعـيني ؟!!

2ـ يا حنين إجروحنه وملح التراب
والـخـرايب لا سـتـر لا بـيـهـا باب
والعيون اجناب واحنه إبلا حجاب
وآنه كـل عـيـن بسـهـم تـرمـيـنـي

3ـ اشوه عدنه الليل يسترنه الظلام
حته لا تبرالـنـه إعـيـون الـحـرام
وين ذيچ اديارنه وذيـچ العـمام
إهنا يهاشم مـوتـه لـو ناسـيـنـي

4 ـ اثنين واثمانين يتشكن سوى
والجرح ـ گص الحبل ـ يردن دوى
ذبلن امن الشمس وسموم الهوى
وأنأ شما اطوي الدرب يطويني

5ـ احنه من إصيارنه ابيت الوحي
بالحچي حته ويَ اهلنه نستحي
سمعت اهل الكوفه صوتي وصايحي
خاف ما تدري العده ميسريني

6ـ أنأ الما چانت خيالي تشوفه
شافـتـه وسمـعتني اهل الكوفه
إعله الهزل وإيدي بحبل مچتوفه
بالـطبـل ودفـوفــهـا اتـلاگـيـنـي

7ـ علي بويه هنا يكشاف الكرب
شگد بعد للشام كون امشي درب
الموت ريته ولا يعرفوني الغرب
وروس اخوتي يا علي تماشيني