[ وقوف الحسين (ع) على احبّته ]
ما وگف ماجد حليف احزان...وگفت احسين العلى الشبّان
وگفت احسين ابظهر عاشور...محّد وگفها ابظلام اونور
چالكوس ظهره او گلب مكسور...وبدمع محمر يكت مرجان
گام يتلهّف علي اللّي راح...منّه اويصفج وسف بالراح
لـمّن توسّط جمعهم صاح...عهدي ابجفاكم علي ما چان
چم فج گطعتوا اونزلتو اوياي...بالغاضريّه اعله علم اوراي
هيّن عليكم عليه اعداي...حاطت اوماتم الي عوّان
اوهوه الدنيه تركتوها...لجلي اونساكم اهجرتوها
ردتوا شهاده اشتريتوها...بنفوس طيبه شريفة شان
چم جرّبتكم على كل نوع...من النوايب اوبلوه اتروع
من الضماير لبستوا ادروع...ما نسج زيها ابو اسليمان
عني جفيتوا اشسبب يكرام...والكم نواظر اشلون اتنام
ما چان بالطف بنيت اخيام...لوما عهدكم گلب والسان
لـمّن ندبهم وهم ثاوين...موته ولاچن طبك حيّين
حسّت جثثهم ابصوت احسين...تضطرب گامت على التربان
رادت النهضه اوترد اردود...ويّه الغريب الوحيد اتعود
لاچن عذرها حليف الجود...وانحاز عنها ابكدر واشجان
عالعلكمي مر شديد الباس...گصده عزيزه اليشيل الراس
حتّه يويلي لفه العبّاس...اوحن الفصيل اعله اخيّه حان
واشبج العشره على صدره...لاچن تگوّس عظم ظهره
ناداه كسري صعب جبره...عگبك اويافرحة العدوان
راح اعله شبله علي هالنوب...والفه اعله جسمه اووگف منيوب
نادا اومنّه الگلب منشوب...تغمض العينك يچبدي اجفان
ياعلي اويبني اویچبدي الطاح...شیردّه ليّه اوهجرني اوراح
گمرة اخدودك ضوه المصباح...غابن شجاهن يرجم الجان
ياعلي اويبني اوضوه عيني...يامن الدربي تدلّيني
من حال ما بينك اوبيني...وابعدك عنّي يغصن البان
ياعلي اويبني تظن اسلاك...هيهات حتّه الوساده اوياك
ريحانتي انته اوعرگ وجناك...صب عالوطيّه اونبت ریحان
لوردنه ننظر وجه جدّك...چنّه نعاین ورد خدّك
ياريت فگدي گبل فگدك...اولا اشوفك اموسّد التربان
أيّس اومنّه انگطع رجواه...واصفگ يمينه على يسراه
ودّع اعياله اونوه لعداه...ويلاه من ودّع النسوان
