[ موشح للاكبر (ع) ]
طلع شبل احسين من امخيّمه...مردع اومطوس اومشهر صارمه
صارمه والدرع يتبارگ سوه...وجنة الحرّه اوجنته ام الضوه
حين شافه احسين دلاّله التوه...وين يبني اتريد يابدر السمه
گال أريد الكون ويّه اهل الرده...اوهاي روحي اتروح لوجودك فده
كل اخوتي اليوم ويلي امّدّده...اشلون أتم اخلافهم عيني العمه
ياعلي وافيتني حد الوفه...اولا خلف مثلك شبيه انخلّفه
بيك نتسله ابوجه المصطفه...چي تفارجني يروحي المولمه
ضاگ من الهظم يحسين الصور...بعد أخوتي ريت لا طال العمر
مثل صبرك سيّدي مالي صبر...دمع ابوه من سمع حچي ابنه همه
رد یگلّه احسين و گعد بالطنب...والّذي مكتوب من الله وجب
حب اديه اوجدم رجله وانتحب...والابو طاح اعله ابنه ايشمشمه
يشم بيه احسين وابنه ایشم بديه...اوما یود ایفارجه اوخايف عليه
عگب الوداع انهضت شيمته البيه...اوروّط الزانه اورگه ابظهر ادهمه
أدهم امصيّت ابميدان الحروب...والشمال امّه وابوه ريح الجنوب
شلّه اردانه اوتمطه بالركوب...اوصاح ثجلوهه اوعلى العسكر حمه
من حمه ابن السبط واهتزاله الكون...اوشاهت ابشعّته امن الناس العيون
اوصاح يصحاب الوثن وين اتغدون...والمنايه الكم سفنها امجدّمه
مجدمه لرواحهم سفن الحتوف...واخذ بأوّل صولته وجه الصفوف
لو سمع بالخوف ينشد شنو الخوف...ما يفر والموت شانه اوغانمه
غانمه افخر على جملة الناس...حجر هوّه در ذهب والكل نحاس
لو وگع سيف المذهب اعله الراس...احسب الفارس جسم جگ اجسمه
الّذي بالمكرمه الطيب انتسب...ما تبره النه الغرايب والعجب
ما سوه الروح ابطعنته ما سلب...اوزانته بس بالسيوف امنظمه
اوعين ليله شابحه ابوجه الحسین...والحسين الضنوته شابح العين
بين ما فرحان بيه اومستعين...انخطف لونه اوتكوّر محزمه
نادته ليله يبن سيد البشر...لونك اتغيّر اوأظن عندك خبر
جره اعله ابني نایبه گلي اوضرر...نعم جاوبها يليله المولمه
انحدر لبنچ عليه فارس شدید...اتربّه ابحجر الحرب گابع بالحديد
ما ابگلبه من رحم كافر عنيد...خايف اعليه لن يصيبه ابلهذمه
اسمعت خطبه من رسول الله اوجواب...ايفرج الكربه اوشفيّه امن الصواب
اندعي لابنچ دعه الام مستجاب...لعل ربّه من اید هذا ايسلّمه
طبّت الخيمه اوهیه امدلّعه...اوصاحت ابمهجه صديعه مولّعه
رفعت ايديها اوجادت بالدعه...والدموع اسحاب چنهه ساجمه
تسجم ادموع المدامع چالسحاب...فوگ خدهه لاچن اوياهه التهاب
ميّلك برگعهه عنهه والحجاب...واشخصت بعيونهه الرب السمه
نادته ابعبره الدمع عالخد يكت...الك ما للغير بعيوني اشخصت
يامن اليعگوب يوسف عاودت...عودلي ابني علي واهلك ظالمه
