[ يابيوت آل النبي وخيامها ]

يابیوت آل النبي وخيامها...وين عباس او علي اوجسّامها

الاه والحسرات صارت سلوتي...اوماجمر همي يذّوب چبدتي
سیل دمع العين يكره ابوجنتي...او ماعلى إجفوني يمر امنامها

أسهر اودابي البچه اولحني الونين...وأخمش ابوجناتي والطم عالجبين
شمس مجدچ وين عامودچ حسين...والگمر عباسها وظرغامها

غابت إبـّحَر الدمه ابوادي الطفوف...وكسفتها ارماحها وبيض السيوف
نزلو ابهالدار لاچنهم إضيوف...اوفرض يوجب للظيوف اكرامها

الوليمه الحرب والزاد السلاح...وهي البيض الماضية او سمر الرماح
چم مثيل حسين وجهه والصباح...بدر من يبزغ يجلي اظلامها

امسه وعليه الجنه نابت شجر...وفصلّت جثته المواضي والسمر
اثنين والسبعين والسبعة اوعشر...بالهجير اعلى الرمول إجسامها

فوگها تعصف ذواري البالرياح...ابدان لاچنهم الجسم العز رواح
للرمك اضحت ميادين إومراح...وبحوافرها ترض اعضامها

ماعليهم باس لوراحو چتل...للسيوف او للرماح او للنبل
منهم الكل ظعن محمود الفعل...اوحضه ابفردوس العله ونعامها

الرجال الموت لو بالسیف صار...تفتخر بيه والحتم عالفرش عار
لاچن اشعامله امن اذنوب الزغار...بالسيوف او بالنبال افطامها

جاوبتني الدار لاچن الجواب...هد رُكن حيلي اومني القلب ذاب
من بني عدنان سبعه اوعشر شاب...ماي ماصّب عليها أحلامها

غير ابوالسجاد واصحاب الشيم...شوس صُحبه كل فرد منهم علم
حمو دين الله اوگضو دون الخيم...والمثل ظل ينضرب بكرامها

مثل هالسبعين ماصار او يصير...اومالهم بالكون عينه او لانظير
گلب العالم الرب ظهر او ضمير...وجد هالسبعين بس من عامها

اختارهم للدّين وأحسن ماأختار...نعم وهداهم لبو اليمه انصار
بيهم ابن الفحل حامي الجار غار...عالعراقين او نجدها او شامها

لون ما وعده اومن الله الأمر...ماسلم من مرهفه طاير يفّر
لاچن المحتوم چتال الحذر...والمناية امحال تخطي اسهامها

مِسَوهالطيبين نومه اعلى الطعوس...وبحوافرها الرمك بيهم تدوس
چالضحايه امجزره من غير روس...او فوگ روس الزان رفعو هامها

ريت سفيان الطواغيت اكتفت...ببو اليمّه اوعن اعاييله عفت
حرم ولهانات بخيمها بگت...فاگده وليانها وعمامها

طايرات اعيونهن من الرعب...والمصايب والنوايب والكرب
بین ما يتراجفن لن السرب...للطنب الوت الگوم الجامها

سلبوهن على الراده او على الكيف...ونشبوها الرهگ والذل والرجيف
اه ياويلاه ياوسفه او يحيف...ابنات وحي الله ايعدن بهيامها

اشلون هجمه الخيل هجمت عالطنب...من أوصفها اعتذر عگلي اوذهب
الحرم فرّت او تابعها الطلب...إذياب وتحاوشت چن اربامها

ماعليهن سِتر ظل غير الچفوف...لها الحد حتّه البراجع والشفوف
ریت حاظر ياعلي او عينك تشوف...حال زينب والحرم ویتامها