إلى متى أظل أنادي عباس...حلم علم شمر يجيني يا ناس
لحظه عيني غمضتها وفتشتها اعله النار...لني وحدي ابلا خيامي والشمر يحكم صار
جيبو زينب ردوا زينب يالله شتمو الكرار...آنا أسمع بس شسوي حرمه واجفوفي اقصار
صحت يخي يخي خدرنه حساس...إلى متى أظل أنادي عباس
خويه مدري اشصار بيه من دخان الخيام...من خيمنه للشريعه اكبرت مية عام
هذا شيبي كله منك انت مرتاح اتنام...بالله قلي يا سبية عدها عسكر أيتام
متت قهر لأن خيمنه تنداس...إلى متى أظل أنادي عباس
خل أذكرك بالطفولة لو شفتني شتقول...انتي أمي انتي أختي وآنا أقلك مسؤول
هسه جنك معرفتني يالوفي ما معقول...احجي خويه قلي أي شي قلي امشي مقبول
صحت ردت ولو تقلي لا باس...إلى متى أظل أنادي عباس
ما تجيني آنا جيتك يالقلت لي بحماي...خلي عذرك والفواطم ما يريدن الماي
هذا جفي هذي عيني خويه بس رد اوياي...آني ابجي وانت نايم من يصدقني بهاي
بلا خيم تره وعلينه حُراس...إلى متى أظل أنادي عباس
خويه والله الماي كله ما يساوي جفين...وابن جوشن عينه صلفه وانت ما عندك عين
قلي زينب شوفي شوفي من قطع راس حسين...ثم ناده ها يزينب هذي جانت لج وين
صفه الخدر تحت سياط الأرجاس...إلى متى أظل أنادي عباس
احترامي السهم عينك آني غمضت اعيون...انت قلي وينه جودك وآنا أراويك امتون
خويه كلها الناس تهمس بس عرفت اشيحجون...والله حقهم آنا زينب وحدي ما يصدقون
بمن بعد أنا مصابي ينقاس...إلى متى أظل أنادي عباس
مره قلت لك مد لي إيدك من سمعت التهديد...واستحيت وقلت عذرا أنت ما عندك إيد
والسلبني ما تركني يسحن بقلبي ايريد...ظل يكرر وين اخوتج والكفالة متفيد
لون عدل فلا رقية تنجاس...إلى متى أظل أنادي عباس
من سكينه هالوصية واستماعك مريود...اخذي دمعي صيحي يمه عمي وين الوعود
من نخيته ما فزع لي حته لو ما كو ازنود...لو يحبني خل يجيني آني ما ريد الجود
صحت يعم لمن قطعت الأنفاس...إلى متى أظل أنادي عباس
قمر زينب ليش مطفي ضوي دربي الملهوف...جيت أشبقك وانت صعبه تشبك ابلايه اجفوف
راح اعوفك بس أخبرك هالأمر وانت اتشوف...الشيعه باجر تعتني لك ممشه واتجيك ازحوف
نعم وفي العهد ترابه ينباس...إلى متى أظل أنادي عباس
