آيبني التحنت بالدمه إچفوفه...آ يبني العليك الـروح ملهوفه
عريس إو يزفونه...وإبدمـه يحنونه
آيبني التحنت بالدمه إچفوفه
* * *
رمله يا جاسم إتنادي إو يهل دمع العين منها
يبني هذا اليوم يومك لا تخيب أمك مضنها
بيك والروح إبعزمها إتعيش وياك إو حزنها
والفرحه بدلها الدهر...بالحزن يبني وبالكدر
وكلما جره إبحكم القدر...والقدر كثَّر محنها
ماني أُمك يجاسم وإتعبت برباك...ماني أُمك وأطلبك بالثدي الغذاك
عهد ما بينك وبيني...أسليك وتسليني
آ يبني التحنت بالدمه إچفوفه
* * *
يبني هذا اليوم منك رادتي وغاية العندي
تنتهب تبرز وجودك دون أبو السجاد تفدي
الروح يا روح وعلينه الواجب إتحتم وگصدي
تنفيذ مـا راد الحسن...منك إو مني إبهالزمن
نصبر يجـاسم عالمحن...والعليه واجب إيأدي
هذا الـواجب وبالطف ينادينه...يگلي إبنچ يرمله لا تمنعينه
وحيد حسين بالحومه...واليوم الوفه يومه
آ يبني التحنت بالدمه إچفوفه
* * *
يبني أبوك الحسن وصّه إبعمك وهاي الوصيه
عندي محفوظه وأمانه إو راح أ أدي إللي عليّه
مثل ما راد إبوصيته من نزلنه الغاضريه
وإخيامنه بيها إنبنت...وإجيوش بيها إتجمّعت
والحرب أبو اليمه إعتنت...تطلب الچتله آل أميه
هذا اليوم مطلوب الوفه منك...وأيام الشدايد ما يهمنك
عمك يولدي عمك...عليه لا تبخل إبدمك
آ يبني إلتحنت بالدمه إچفوفه
* * *
والولد لو چان مثلك طيب ويبذل الهمه
يندفع للطيب نفسه والمواقف ما تهمه
إو تشهد أرض الغاضريه إبوگفتك ويّه أبو اليمه
تشهد الحومه إبصولتك...ترهب إگلوب العادتك
گرّت إعيون الربتك...يالغذاها إبفيض دمه
گضيت إنته العليك إبحومـة الميدان...إو آنه الظل عليّه لو شفت شبان
روحي إشلون أسليها...أهلهل لو أعزيها
آ يبني إلتحنت بالدمه إچفوفه
* * *
عاش گلبي إبحلم عرسك والعرس محروم منه
لاچن إنته إلما حرمته وإبفضل جهدك تهنه
إبنصرتك لحسين يبني واجبك وافيت عنه
إو چنت أنتظر هذا الوفه...منك إبعين العاطفه
أديته وأصبحلك صفه...والگلب ما خاب ظنه
هـاك إخذ الگلب وإتأمله وشوفه...عليك إشچم جرح مجروح وإتعوفه
وأجيب الفگدت أحبابه...عليهم يصعب إغيابه
آ يبني إلتحنت بالدمه إچفوفه
* * *
من قديم الزمن چانت هاي للعريس عاده
إبحنـّه إيحنون إديـه إو يشعر إبراحه إو سعاده
گلي يا عريس مثلك حنته إبدم الشهاده
يا هو الـذي ما حضرته...لا خلته ولا صحبته
وعالموت صارت زفته...وإعتنه الموت إبإراده
نبل وإسهـام وإسيوف اليزفنك...طفت شمعة شبابك وأيّست منك
إمبارك عرسك إمبارك...إبحومة كربله أخبارك
آ يبني إلتحنت بالدمه إچفوفه
* * *